Raġel mill-Gżira kellu l-libertà proviżorja miċħuda wara li ġie akkużat li kien kompliċi fis-serqa ta’ pastizzerija ta’ Ħal Qormi f’Marzu li għadda. Ħaddiem tat-takeaway Hubert Gatt ta’ 32 sena tressaq quddiem il-Maġistrat Josette Demicoli akkużat b’serq, aggravat bi vjolenza, valur u ħin.
L-Ispetturi Lydon Zammit, Stephen Gulia u Kevin Pulis qalu lill-qorti li l-Pulizija arrestaw lil Gatt wara li investigaw serqa bl-armi f’pastizzeria f’Ħal Qormi fit-30 ta’ Marzu fit-8pm. Huwa qal li l-Pulizija l-ewwel arrestaw lil Jeremy Borg, li kien qed jiffaċċja proċeduri separati u saru diversi arresti oħra.
Wara li nġabar mill-Pulizija, Gatt kien ikkonferma fi stqarrija li kien qed isuq il-karozza involuta fis-serqa biha li l-allegati ħallelin spiċċaw jaħarbu biha. L-Avukat ta’ Gatt, Ishmael Psaila daħħal risposta ta’ “mhux ħati” f’isem l-akkużat u talab il-libertà proviżorja.
Il-Prosekuzzjoni oġġezzjonat bil-qawwa għall-ħelsien tar-raġel mill-arrest, bl-argument li r-reat kien wieħed gravi u li r-rekord kriminali tiegħu wera li ma kienx ta’ min jafdah. Barra minn hekk, kien għad hemm xhieda ċivili li għad iridu jixhdu.
Psaila argumenta li l-akkużi jmorru lura erba’ xhur u li l-Prosekuzzjoni kienet infurmat lill-Qorti li l-inkjesta Maġisterjali dwar l-inċident kienet magħluqa, u ppreservat l-evidenza. Barra minn hekk, il-persuna allegatament li wettqet is-serqa kienet ukoll arrestata.
“Sempliċement għax xi ħadd huwa mitlub jagħti lift lil xi ħadd u jagħmel hekk mhuwiex raġuni biex jiġi akkużat.” Iżda l-Ispettur Pulis irribatta, u qal li fl-erba’ xhur mill-inċident, il-Pulizija kienu qed jiġbru l-provi. “Aħna qegħdin hawn biex inġibu l-aħjar evidenza.
“Għandna xhieda li raw kollox u li dawn kienu magħrufa wara li ġiet konkluża l-inkjesta Maġisterjali u l-akkużat jafhom sew, ”qal l-Ispettur. Psaila kkummenta li kien “inkwetanti” li jisma’ li l-Pulizija kienu komplew jinvestigaw wara li għalqu l-inkjesta u żied “hu kien barra għal tliet xhur, avviċina lil xi xhieda?” Il-Qorti, madankollu, ċaħdet il-libertà proviżorja f’dan l-istadju, fejn il-Maġistrat Demicoli ddikjarat li ma kinitx qed tara lill-akkużat bħala persuna li jissodisfa l-garanziji stabbiliti fil-liġi, anke minħabba x-xhieda li kienu għad iridu jixhdu.
