Il-Kap tal-Partit Nazzjonalista Bernard Grech dalgħodu kellu laqgħa virtwali mal-Viċi Ministru Internazzjonali Ċiniż Guo Yezhou.
Tul il-laqgħa, kienu diskussi punti importanti dwar kif ir-relazzjonijiet bejn iż-żewġ pajjiżi jistgħu ikomplu jitjiebu.
Il-Viċi Ministru Ċiniż iddeskriva lill-Partit Nazzjonalista bħala forza politika kruċjali f’Malta b’esperjenza vasta fil-governanza u li ta kontribut enormi għall-iżvilupp ta’ pajjiżna. Yezhou faħħar il-viżjoni Ewropea li kellu il-PN għal snin twal u li wasslet biex dan irnexxielu jdaħħal lil pajjiżna fl-Unjoni Ewropea.
Guo Yezhou elenka fatturi li jistgħu ikomplu jsaħħu r-rabta bejn iż-żewġ pajjiżi. Hu semma djalogu aktar profond li jwassal għal ftehim aktar wiesa’ taż-żewġ partijiet kif ukoll skambji ta’ mexxejja żgħazagħ bejn Malta u ċ-Ċina sabiex ikunu żgurati relazzjonijiet tajbin bejn iż-żewġ pajjiżi anke fil-futur
Minn naħa tiegħu il-Kap tal-Partit Nazzjonalista Bernard Grech qal li hu dejjem emmen bis-sħiħ li relazzjonijiet tajba bejn żewġ pajjiżi huma wkoll il-bażi ta’ tisħiħ fl-ekonomiji tagħhom u faħħar il-mod kif iċ-Ċina dejjem tat importanza kbira lejn ir-relazzjoni ma’ Malta.
Grech qal li l-Partit Nazzjonalista se jibqa’ jaħdem sabiex bit-tisħiħ tar-relazzjonijiet bejn Malta u ċ-Ċina, jikbru wkoll l-opportunitajiet għaż-żewġ nazzjonijiet.
Preżenti għal din il-laqgħa virtwali kien hemm ukoll il-Kelliem tal-Partit Nazzjonalista għall-Affarijiet Barranin Carm Mifsud Bonnici u s-Segretarju Internazzjonali tal-PN Roslyn Borg Knight.
//= $special ?>