Il-Gvern komunista ta’ Kuba qed jipprova jikkontrolla l-għadab tal-poplu li hu mxabba’ bis-sitwazzjoni ekonomika prekarja tal-pajjiż u fi żmien meta n-nies qed jiffaċċjaw nuqqas akut tal-ikel u l-mediċina. Dan waqt li l-prezzijiet tal-affarijiet essenzjali sparaw ‘il fuq, bil-poplu qed jilmenta wkoll dwar kif il-Gvern qed jitratta l-effetti tal-pandemija tal-Covid-19.
Fl-aħħar sigħat kienu arrestati għexieren ta’ nies wara li eluf issieħbu fl-akbar protesti għal snin kontra l-awtoritajiet komunisti ta’ Kuba. Il-protesti huma sinifikanti għaliex il-kritiċi tal-Gvern Kuban dejjem jiffaċċjaw il-pieni ħorox għal kwalunkwe espressjoni ta’ dissens fil-pajjiż.
Sadanittant, il-President ta’ Kuba, Miguel Díaz-Canel, qed jirrifletti d-disprament tat-tmexxija komunista b’sejħa biex is-sostenituri tal-Gvern’jiġġieldu kontra d-dimostranti li qed joħorġu fit-toroq biex jesprimu r-rabja dwar is-sitwazzjoni.
L-għajta ta’ eluf ta’ Kubani hi li r-reġim komunista ‘mhux iħallihom jgħixu’ fost l-għajjat kontra ‘id-dittatorjat f’Havana’. Id-dimostrazzjonijiet qed isiru madwar Kuba u partikularment fil-belt kapitali tal-gżira Stat fil-Karibew.
Id-dimostranti għamluha ċara li mhumiex qed jibżgħu u li jridu ‘jaqilbu l-paġna’ wara snin twal ta’ dittatorjat. Dan waqt li f’Havana komplew l-arresti tan-nies mill-qawwiet tas-sigurtà li qed ikunu megħjuna mill-pulizija pajżana. Fl-aħħar sigħat kien hemm ukoll il-blackouts għall-Internet madwar Kuba.
Il-President Miguel Díaz-Canel, f’xandira lin-nazzjon, waħħal fl-Istati Uniti għal din il-kriżi waqt li attakka s-sanzjonijiet li l-Amerikani ilhom jimponu fuq pajjiżu mill-1962 bħala ‘politika intiża biex toħnoq lill-poplu ta’ Kuba’.
Díaz-Canel qal ukoll li d-dimostranti li qed jipprotestaw kontra l-Gvern tiegħu huma ‘merċenarji’ imqabbdin mill-Istati Uniti u li jridu jiddistabbilizzaw lil pajjiżu. Intant, hu irrepeta biex is-sostenituri tiegħu ‘joħorġu u jiddefendu r-rivoluzzjoni’, f’referenza għar-rewwixta storika tal-1959 li fetħet il-bieb għal għexieren ta’ snin ta’ amministrazzjoni komunista f’Kuba.
//= $special ?>