Triq Garibaldi l-Marsa bħalissa tinsab magħluqa għat-traffiku hekk kif fl-aħħar sigħat żviluppaw nirien fi scrapyard fil-qrib. Il-Pulizija kienu mgħarrfa bin-nirien għall-ħabta tas-12.50pm.
Ħaddiema tat-tifi tan-nar fi ħdan id-Dipartiment tal-Protezzjoni Ċivili jinsabu fil-post biex jikkontrollaw in-nirien.
Uffiċjali tal-Pulizija wkoll marru fiż-żona tal-flyover tal-Marsa sabiex jinvestigaw.
Hu mifhum li ħadd ma weġġa’ f’dan l-inċident.
Sewwieqa huma mitluba jevitaw din it-triq.
