Il-każ dwar ħasil ta’ flus kontra s-sidien tar-ristoranti Florinda Sultana (ritratt) u Albert Buttigieg kellu jiġi pospost wara li l-Prosekuzzjoni naqset milli tidher fil-Qorti. Dan l-aġir urta mhux ftit lill-Maġistrat Donatella Frendo Dimech fejn quddiemha qed jinstemgħu ħemel ta’ kawżi marbutin ma’ reati simili u li huma ferm mexxejja.
Is-seduta kellha tibda għall-ħabta ta’ nofsinhar iżda wara 30 minuta ħadd minn naħa tal-Prosekuzzjoni ma deher. Sultana u Buttigieg kienu preżenti flimkien mal-avukat tagħhom Stefano Filletti. Minħabba dan it-telf taż żmien il-Maġistrat “iddeplorat” dawn in-nuqqasijiet minn naħa tal-Prosekuzzjoni, u nsistiet li tingħata spjegazzjoni fi żmien 24 siegħa u għalfejn naqset milli tidher.
“Lanqas uffiċjali tal-Pulizija baqgħu ma dehru,” hija rrimarkat. Sultana u Buttigieg huma akkużati b’involviment f’numru ta’ kumpaniji li joperaw ir-ristoranti, Porticello (li qabel kie jismu Scoglitti ) fil-Belt Valletta, u Capo Mulini f’Marsaxlokk. Iż-żewġ ristoranti huma allegatament marbuta mal-ħasil ta’ flus mill-kuntrabandu taż-żejt.
Il-koppja kienet is-suġġett ta’ mandati ta’ tiftix u arrest is-sena l-oħra waqt operazzjoni tal-Pulizija fuq skala kbira kontra l-kuntrabandu li preċedentement wasslet għall-arrest tal-ex-futbollers internazzjonali Maltin Darren Debono u Jeffrey Chetcuti, u l-awditur tagħhom Chris Baldacchino.
Il-kummerċjant tal-fjuwil u s-sieħeb fin-negozju ta’ Debono, Gordon Debono ġie mixli wkoll. Matul is-seduti preċedenti, il-Maġistrat semgħet kif Sultana u l-kumpanija tagħha ma tħallewx jiftħu kontijiet bankarji minn banek lokali, bir-ristorant jopera fuq bażi ta’ flus kontanti biss.
“M’hemm l-ebda kont bankarju li jaħdem mal-kumpanija f’Malta. L-ebda wieħed mill-banek ma jrid jippermettilhom li jkollhom kont magħhom peress li huma soġġetti għal investigazzjonijiet tal-FIAU u l-banek ma jridux problemi,” l-amministratur maħtur mill-qorti kien qal fil-Qorti, li talabhagwida dwar kif tittratta s-sitwazzjoni.
€52,000 fi flus kontanti, oġġetti varji tad-ditta inklużi Gucci u Armani u 10 arloġġi, inkluż Rolex, vażetti kbar tal-ħġieġ li fihom karti tal-flus u muniti kif ukoll karozza Audi kienu konfiskati mill-Pulizija hekk kif Sultana u l-eks uffiċjal tal-bank għaddejjin proċeduri kontrihom fuq ħasil ta’ flus
L-akkużati huma t-tifla tar-rispett ta’ Darren Debono u eks uffiċjal għoli ta’ bank, li jmexxu kumpaniji li jamministraw żewġ ristoranti tal-ħut lokali, allegatament involuti fil-ħasil ta’ fondi illeċiti marbuta mal-kuntrabandu taż-żejt. Florinda Sultana ta’ 29 sena u Albert Buttigieg,qed iwieġbu mhux ħatja ta’ numru ta’ akkużi meta nbdew il-proċeduri kontrihom.
It-tnejn li huma qed jiffaċċjaw akkużi kriminali fil-kapaċità personali tagħhom, filwaqt li Sultana hija akkużata wkoll bħala eks direttur ta’ Nesvan Company Ltd u MSI Catering Ltd u Buttigieg bħala direttur ta’ Luzzu Catering Ltd, l-operaturi tar-ristoranti Porticello u Capo Mulini, rispettivament.
L-Ispetturi Joseph Xerri, James Turner u Omar Caruana qed imexxu l-prosekuzzjoni, assistiti mill-avukati tal-AG Antoine Agius Bonnici u Cinzia Azzopardi Alamango. L-Avukat tal-akkużati huwa Stefano Filletti.
