Tul il-jum tas-Sibt tħabbar li mill-aħħar ta’ Lulju, fin-nofsinhar ta’ Malta, se jkun hemm attrazzjoni ġdida għal bugħaddasa.
Dan hekk kif fil-31 ta’ Lulju se tkun qed titniżżel fil-baħar il-patrol boat P33 – patrol boat mibnija fil-Ġermanja tal-Punent fl-1971 u li intużat mill-Iskwadra Marittima tal-Forzi Armati ta’ Malta bejn l-1992 u l-2005.
Din ser tkun qiegħda fiż-żona ta’ Żonqor Point f’Wied il-Għajn bejn il-bastimenti mgħarrqa u attrazzjonijiet stabbiliti ta’ St. Michael u Melita.
Dan il-proġett li ilu biex jitwettaq għal dawn l-aħħar snin kienet proposta xprunata mill-Partit Nazzjonalista, partikolarment fis-sett ta’ proposti mressqa fid-dokument 2+8; It-triq ‘il quddiem għall-irkupru fis-settur turistiku ta’ pajjiżna.
Għal darb’oħra l-Partit Nazzjonalista wassal sabiex proposta tiegħu ttieħdet b’serjetà mill-Awtoritajiet konċernati għal ġid tal-poplu Malti u Għawdxi bil-għan li attrazzjoni bħal din mhux biss titgawda mill-bugħaddasa lokali iżda ankè sservi ta’ inċentiv għat-turiżmu tant bżonnjuż għall-ekonomija tal-pajjiż.
