Tersqux lejn dan l-istabbiliment f’Paceville la darba ma titteħidx azzjoni li tigarrantixxi s-sigurtà meħtieġa.
Dan kien l-appell lill-komunita LGBTIQ f’pajjiżna tal-Malta Gay Rights Movement wara li ġie allegat abbuż omofobiku fuq koppja gay.
Aktar kmieni fuq il-midja soċjali, fuq grupp partikolari, Celine Balzan Gera spjegat kif flimkien mat-tfajla tagħha spiċċaw abbużati u saħansitra msawta minn bouncer li xeħithom ‘il barra bil-forza wara li qasmu bewsa bejniethom fl-istabbiliment.
Dan filwaqt li spjegat li rnexxielha tieħu ritratt tal-allegat aggressur.
Hija saħqet li qatt f’ħajjitha ma esperjenzat attakk omofobiku u appellat lill-awtoritajiet sabiex jieħdu l-azzjoni meħtieġa.
Dan filwaqt li l-MGRM saħqet li f’każ li persuna tirċievi dan it-tip ta’ abbuż, il-membri tagħha lesti jakkumpanjawhom f’Għassa tal-Pulizija sabiex iwettqu rapport filwaqt li fakkret ukoll li toffri servizzi legali gratis.
Intant f’kummenti li ta lill-midja, sid l-istabbiliment spjega li qed jinvestigaw il-każ internament u qed jikkollaboraw ukoll mal-Pulizija hekk kif din hija sitwazzjoni serja ħafna.
