L-Iran qed jiċħad għal kull sehem fl-attakk tal-ġimgħa l-oħra li sar fuq tanker tal-Iżraeljani li kien qed iġorr il-petroleum u li ħalla żewġ mejtin – Britanniku u Rumen. L-inċident kien seħħ ‘il hinn mill-kosta tal-Oman, b’Iżrael jakkuża lir-reġim Iżlamiku f’Tehran dwar ‘l-attakk mingħajr provokazzjoni’.
Il-Prim Ministru Iżraeljan Naftali Bennett issa qal li l-Iran ‘qed jipprova jiżgiċċa mir-responsabbiltà tiegħu’ waqt li sostna li Tehran ‘qiegħed juri l-atteġġjament ta’ kodard fiċ-ċirkustanzi’.
L-Iran wieġeb b’kundanna għall-akkużi tal-Iżraeljani, b’kelliema f’Tehran jenfasizzaw li ‘Iżrael irnexxielu joħloq klima ta’ terrur u vjolenza fir-reġjun’. Il-Gvern Iranjan fl-istess ħin qal li Iżrael, b’dawn l-akkużi ‘mingħajr bażi’ , kien qed jipprova jdawwar l-attenzjoni ‘il hinn mill-fatti.
Il-Britanniku u r-Rumen tilfu ħajjithom meta, nhar il-Ħamis, it-tanker ‘Mercer Street’ – ta’ sidien Ġappuniżi u mmexxi mill-kumpanija Iżraeljana Zodiac Maritime – spiċċa attakkat minn allegat drone. Intant, l-investigaturi għad jonqoshom għall-provi konklussivi relatati mal-azzjoni.
//= $special ?>