Tony Armando Zahra ta’ 46 sena u Josephine Grixti ta’ 55 sena, li ġew arrestati fi ftit sigħat mis-serqa vjolenti fejn raġel ta’ 43 sena, li kien għaddej bil-mixi kien fil-mira fejn twaqqaf, insteraq u spiċċa mhedded b’sikkina. Dan waqt li kien għaddejja minn Ġnien il-Kunsill tal-Ewropa għall-ħabta tal-11am.
Il-vittma allegatament ġie avviċinat l-ewwel mill-mara li talbitlu l-flus. Ftit tal-ħin wara ingħaqad magħha is-sieħeb tagħha li allegatament hedded lill-vittma b’sikkina, u talab aktar flus. Il-vittma ħarab minn fuq il-post, bl-aggressuri jiġru warajh it-triq kollha lejn proprjetà privata fejn fl-aħħar fittex kenn.
Madwar €40 allegatament insterqu fl-inċident vjolenti. Bdiet tfittxija għaż-żewġ suspettati u fis-siegħa, il-mara nstabet u ġiet arrestata fl-istess lokalità. Aktar tard, uffiċjal tar-Rapid Intervention Unit li kien off duty ra lis-suspettat, ir-raġel bilqiegħda f’karozza li kienet qed tinstaq fill-Gżira.
Il-koppja wieġbu mhux ħatja ta’ serq aggravat u estorsjoni. Ir-raġel ġie akkużat separatament li ġarr sikkina mingħajr il-liċenzja tal-pulizija meħtieġa u li għamel ħsara intenzjonali fuq propjetà ta ’terzi. Il-mara ġiet akkużata separatament bi tlajjar u li għamlita ta’ tallaba.
Talba għall-ħelsien mill-arrest ġiet miċħuda u l-qorti, preseduta mill-Maġistrat Nadine Lia, żammet lill-koppja taħt arrest. L-Ispettur Lydon Zammit prosegwixxa. L-avukat Benjamin Valenzia kien avukat tal-għajnuna legali għal Zahra, filwaqt li l-avukat Lennox Vella assista lil Grixti.
