Il-Pulizija mill-Iskwadra ta’ Kontra Droga, arrestat raġel ta’ 23 sena mill-Gambja, waqt li allegatament kien qiegħed jitraffika d-droga kannabis.
It-Tnejn, għal xi 12:00, il-Pulizija kellha informazzjoni li fl-inħawi magħrufa bħala ta’ Fra Ben, il-Qawra, kien hemm persuna suspettata li kienet fil-pussess tad-droga, lesta biex tinbiegħ.
Fuq il-post marru Pulizija mill-Iskwadra ta’ Kontra Droga, bdew josservawh fejn allegatament anke avviċina xi persuni sabiex ibiegħ d-droga. Wara ħin t’osservazzjoni, il-pulizija arrestat lir-raġel u nstab fil-pussess ta’ 45 pakkett suspettat ħaxixa tal-kannabis.
Dalgħodu r-raġel ser jitressaq il-Qorti b’arrest għall-ħabta tal-11:00 quddiem il-Maġistrat tal-Għassa Claire Stafrace Zammit.
L-investigazzjonijiet tal-Pulizija għadhom għaddejjin.
