F’Lulju għaddew mill-Ajruport Internazzjonali ta’ Malta 311,692 passiġġier, li jfisser irkupru ta’ 39% tal-livelli tat-traffiku rreġistrati f’Lulju 2019.
Madankollu, ir-rata ta’ rkupru ta’ Malta kienet aktar baxxa minn dik ta’ ajruporti oħrajn fin-Nofsinhar tal-Ewropa li, skont dejta ta’ Airports Council International, kellhom rata medja ta’ rkupru ta’ 57% fix-xahar ta’ Lulju.
In-numru ta’ postijiet disponibbli fuq titjiriet minn u lejn Malta kienu biss 35.5% anqas mil-livelli tal-2019, bis-seat load factor (SLF) għax-xahar, li jkejjel kemm minn dawn il-postijiet kienu okkupati, ikun ta’ 52.6% meta mqabbel ma’ 87.0% f’Lulju 2019.
Tul ix-xahar ta’ Lulju żdiedu l-opportunitajiet ta’ safar għas-suq lokali hekk kif il-linja nazzjonali ta’ Franza Air Franza nediet servizz ta’ tliet darbiet fil-ġimgħa lejn l-ajruport Paris Charles de Gaulle u żdiedu wkoll ir-rotot ġodda ta’ Chania u Cagliari mal-iskeda tas-sajf tal-Ajruport Internazzjonali ta’ Malta, fost żviluppi oħrajn.
F’Lulju l-Ajruport Internazzjonali ta’ Malta reġa’ ra lir-Renju Unit fost l-aqwa ħamest iswieq tiegħu wara li ġew irrilassati xi restrizzjonijiet fuq l-ivvjaġġar bejn iż-żewġ pajjiżi u, sussegwentement, xi titjiriet fuq rotot lejn dan is-suq bdew jiġu operati b’mod aktar frekwenti u ġew introdotti wkoll rotot addizzjonali minn għadd ta’ linji tal-ajru.
Ir-renju Unit tela’ erba’ postijiet minn Ġunju, bil-konsegwenza li s-suq Spanjol tilef postu fost l-aqwa ħamest iswieq u l-Ġermanja, Franza u l-Polonja kollha niżlu post minn Ġunju. L-Italja, min-naħa l-oħra, baqgħet fil-quċċata b’60,388 moviment tal-passiġġieri.
Evalwazzjoni tal-andament tal-industrija tal-avjazzjoni maħruġa minn Eurocontrol fit-22 ta’ Lulju nnutat li t-traffiku fl-Ewropa żdied b’mod ċar fl-10 ġimgħat li wasslu għall-publikazzjoni ta’ din l-evalwazzjoni, bl-ivvjaġġar domestiku jkompli jiddomina t-traffiku.
