Malti ta’ 36 sena li kien fuq vaganza ta’ xi jiem f’Venezja kien essenzjali biex barrani ieħor kien arrestat wara li wettaq reati kriminali fl-aħħar jiem f’din il-belt turistika popolari fl-Italja.
It-Tnejn li għadda l-Malti stess kien vittma tal-ħalliel, Palestinjan ta’ 32 sena, li waqt li kien fi Piazzale Roma (ritratt) seraqlu basket żgħir li kellu ma’ qaddu u li fih kellu aktar minn €6,000 fi flus kontanti, ħames credit cards, mobile u oġġetti oħrajn ta’ valur.
Kif induna x’ġara, il-Malti beda jgħajjat għall-għajjut, filwaqt li beda jidentifika lir-raġel, li ħarab mill-post, bħala l-persuna li kien għadu kif serqu. Kien dan l-għajjat li wassal biex ir-raġel kien arrestat mill-Pulizija lokali. Meta kienu segwiti filmati ta’ cctv cameras fil-viċin, il-Pulizija kkonfermaw il-verżjoni tal-fatti kif irrakkontata mill-Malti.
Aktar investigazzjonijiet tal-Pulizija wasslu biex il-ħalliel kien identifikat bħala l-persuna li l-ġimgħa li għaddiet ħoloq paniku fil-Canal Grande meta qabeż fil-kanal minn Ponte degli Scalzi fost għadd ta’ bċejjeċ tal-baħar li kienu qed jinstaqu. Att meqjus bħala wieħed li jikser il-Liġi.
Wara li kien arrestat, ir-raġel għadda l-lejl arrestat fl-Għassa tal-Pulizija u t-Tlieta tressaq il-Qorti, fejn kien ikkundannat għaxar xhur priġunerija u li ma jistax joqgħod aktar fil-provinċja Veneta. Min-naħa l-oħra, raġel li kien kompliċi miegħu fis-serqa fuq il-Malti ħarab u s’issa għadu ma nstabx.
