Tibqa’ tinħass il-ħtieġa ta’ strateġija nazzjonali biex pajjiżna jfittex joħroġ mill-greylist li tpoġġa’ fiha minħabba d-deċiżjonijiet żbaljati ta’ Gvern Laburista.
Hekk qal il-Kandidat għall-elezzjoni ġenerali f’isem il-Partit Nazzjonalista Alex Perici Calascione matul konferenza tal-aħbarijiet, fejn innota kif il-Gvern ta’ Robert Abela għadu ma għamel xejn biex jibda jsolvi din is-sitwazzjoni minkejja li jaf li diġà qed jinħass slowdown fis-servizzi finanzjarji.
Alex Perici Calascione tenna t-talba tal-Partit Nazzjonalista lill-Gvern biex jitratta din l-isfida bis-serjetà li tixirqilha u b’azzjoni immedjata, anke fid-dawl tal-fatt li stħarriġ riċenti wera kif madwar 60% tal-popolazzjoni hi mħassba jew imħassba ħafna bil-greylisting ta’ pajjiżna.
Min-naħa tiegħu, il-Kandidat Graham Bencini qal li mill-greylisting qed ibati kulħadd, kemm bi proċessi bankarji itwal, kif ukoll bi spejjeż ogħla għall-kumpaniji fis-settur. Hu qal li hemm bżonn tittieħed azzjoni immedjata biex titnaddaf ir-reputazzjoni, filwaqt li kkwota email ta’ barrani li kien interessat jinvesti fil-cryptocurrency f’pajjiżna, iżda issa ma jridx ikollu x’jaqsam ma’ Malta. U dan meta, il-Gvern suppost għamel minn pajjiżna crypto-island.
Graham Bencini qal li qed naraw aktar pressjoni fuq is-settur, iżda issa hemm bżonn li tittieħed azzjoni fuq il-politiċi li tappnu isem pajjiżna u tefgħuna fil-greylist.
U l-Kandidat Paula Mifsud Bonnici qalet li hu evidenti li Robert Abela ma jridx jiddeċiedi bis-serjetà, tant li jrid jipposponi d-deċiżjonijiet tiegħu għal wara l-elezzjoni ġenerali biex jitlifx mill-appoġġ.
Qalet li kull ġurnata li Edward Zammit Lewis jinżamm bħala Ministru, tkun ġurnata oħra ‘l bogħod milli noħorġu mill-greylist. Għaldaqstant, kif jista’ Abela jkompli jappoġġja lill-Ministru tiegħu meta suppost irid li isem pajjiżna jitnaddaf?
Paula Mifsud Bonnici nnutat kif il-Gvern Laburista daħħal il-mentalità tax-xejn mhu xejn u issa qed jikkonferma dan meta, bi 17-il ġurnata ta’ talbiet kontinwi biex ineħħi lil Edward Zammit Lewis, baqa’ kollox qisu xejn mhu xejn.
