Żdiedu x-xeni tad-disprament barra l-ajruport ta’ Kabul meta eluf ta’ ċittadini u barranin għadhom qed jippruvaw jaħarbu mill-Afganistan…Dan waqt indikazzjonijiet li l-Afganistan qed jiffaċċja renju ta’ terrur ġdid taħt idejn it-Talibani, fost ċirkustanzi inċerti għall-aħħar u meta l-pajjiżi tad-dinja qed ikomplu jsegwu l-aħħar żviluppi ( mill-Afganistan) b’ansjetà kbira.
Filwaqt li t-Talibani qed jikkonsolidaw il-kontroll fuq il-pajjiż, l-ajruport internazzjonali ta’ Hamid Karzai, f’Kabul, sar l-unika triq ‘il barra mill-pajjiż għal għexieren ta’ eluf ta’ Afgani li jinsabu mwerwrin dwar il-futur.
Intant, il-militanti Iżlamiċi tat-Taliban għalqu l-aċċessi mill-art għall-fruntiera u issa qed jagħmluha ċara li ‘ma jridux li l-Afgani jitilqu minn pajjiżhom’.
U waqt li x-xeni barra l-ajruport ta’ Kabul qed isiru aktar kaotiċi, l-aħħar rapporti qalu li t-Talibani qegħdin ifittxu kontinwament għall-Afgani li fl-aħħar snin setgħu għenu b’xi mod lill-qawwiet barranin u l-membri tan-Nazzjonijiet Uniti fl-artijiet Afgani.
Fl-istess ħin, spikkaw rapporti li l-militanti għassa maċ-checkpoints fit-triq prinċipali lejn l-ajruport ta’ Kabul spiċċaw jattakkaw lin-nies waqt sensiela ta’ inċidenti. Dan ifisser li l-vjaġġ lejn l-ajruport inkwistjoni għandu jitqies bħala ferm perikoluż għal kulmin qed jipprova jitlaq mill-Afganistan.
Fil-fatt, raġel mill-Ġermanja spiċċa ferut b’tir waqt li kien qed jipprova jasal fl-ajruport ta’ Kabul u bir-rapporti jgħidu li ‘hu kellu jitlaq mill-aktar fis mill-Afganistan’. Il-Ġermaniż mhux f’periklu li jitlef ħajtu iżda l-isparatura kompliet tindika l-livell tal-kaos madwar l-ajruport fejn il-mijiet tan-nies inġabru viċin l-entratura f’impenn iddisprat biex jaqbdu ajruplan ‘il barra mill-pajjiż.
Il-Gvern tal-Istati Uniti, fl-aħħar sigħat, qal li kien qed jirranka l-pjani għall-evakwazzjoni tan-nies mill-ajruport ta’ Kabul fost kritika li l-programmi tal-evakwazzjoni kienu għaddejjin wisq bil-mod.
Sadanittant, ġellieda tat-Taliban spiċċaw joqtlu membru tal-familja ta’ ġurnalist impjegat max-xandar Deutsche Welle (DW) tal-Ġermanja – b’dan iseħħ waqt li l-ġellieda kienu qed ifittxu għal dan il-ġurnalista minn dar għall-oħra. Fil-fatt, il-ġurnalista, fil-preżent, qed jaħdem fil-Ġermanja u l-familjari tiegħu spiċċat maqtula waqt it-tfittxija.
Jidher ukoll li t-Talibani ferew persuna oħra matul it-tfittxija waqt li huma wettqu r-rejds fir-residenzi ta’ mill-anqas tliet ġurnalisti ta’ Deutsche Welle.
Id-direttur ġenerali tad-DW, Peter Limbourg, ikkundanna l-qtil u sostna li ‘dan kollu juri l-livell ta’ periklu akut li qed jiffaċċjaw l-impjegati tal-istazzjon, flimkien ma’ qrabathom, li qegħdin jgħixu fl-Afganistan’.
Il-World Food Programme (WFP) tan-Nazzjonijiet Uniti wissa, sadanittant, dwar ‘kriżi umanitarja katastrofika’ li qed tiżviluppa fl-Afganistan waqt sena mill-aktar diffiċli.
Dan meta l-effetti tal-gwerra u n-nixfa relatata mal-bidliet fil-klima qegħdin jipperikolaw talanqas terz tal-popolazzjoni Afgana.
Skont l-analiżi tal-WFP, mal-14-il miljuni ( fosthom żewġ miljun tifel u tifla Afgani) qed jissugraw li jispiċċaw vittmi ta’ malnutriżmu, meta s-sitwazzjoni hi dovuta, f’parti, għall-konflitt tal-aħħar xhur fl-Afganistan.
