L-attakkant Portugiż Cristiano Ronaldo qal li r-rekord li waqqaf ilbieraħ fil-partita kontra l-Irlanda huwa verament wieħed speċjali iżda għad fadallu aktar rekord x’jikser. Ronaldo fil-partita ta’ lbieraħ skorja l-110 u l-111 gowl internazzjonali tiegħu biex b’hekk sar l-aktar player li qatt skorja f’partiti internazzjonali.
Ronaldo qal li kull darba li jirrapreżenta lill-pajjiżu huwa mument speċjali fejn jkun qed jiddefendi lill-Portugall. Hu żied jgħid li l-partiti u l-kompetizzjonijiet internazzjonali dejjem ispirawh hekk kif ħafna drabi kien ikun hemm l-idoli tiegħu jilagħbu. Ronaldo faħħar ukoll lil Ali Daei li kellu dan ir-rekord hekk kif l-istess player Portugiż ħaseb li qatt ma seta’ jilħaq dan ir-rekord.
Fl-aħħar jiem tas-suq tat-trasferimenti, Cristiano Ronaldo rritorna ma’ Manchester United mingħand Juventus fejn għaż-żewġ staħuni li ġejjin se jkun qed jilgħab għal darb’oħra fil-Premier League.
