L-atleta paralimpika tal-Gran Brittanja Sarah Storey rebħet is-17-il midalja tad-deheb, biex b’hekk saret l-aqwa atleta paralimpika tal-Gran Brittanja.
Storey ddefendiet it-titlu tagħha fis-C4-5 road race biex b’hekk qabżet lill-atleta li kellu r-rekord ta’ midalji Mike Kenny. L-atleta Brittanika, Crystal Lane – Wright temmet fit-tieni post, seba’ sekondi wara Storey.
F’kummenti lill-midja wara t-tellieqa, Storey qalet li tinsab kuntenta ferm b’dan ir-riżultat. Din il-midalja tad-deheb kienet it-tielet waħda għal Storey f’dawn il-Paraolimpjadi u t-tmien waħda sa mid-debutt tagħha fl-1992 fil-Paraolimpjadi ta’ Barcelona. B’hekk Storey issa għandha 28 midalja fil-karriera tagħha.
