Żewġ personalitajiet ewlenin tal-Oppożizzjoni li sfidaw il-leġittimità tal-aħħar elezzjoni Presidenzjali fil-Belarus ingħataw sentenzi ta’ ħabs ‘talli ppruvaw jheddu lis-sigurtà nazzjonali u jaħtfu l-poter’.
Maria Kolesnikova, li organizzat il-protesti kontra l-Gvern tal-President tal-Belarus Alexander Lukashenko, intbagħtet il-ħabs għal 11-il sena waqt li l-avukat Maxim Znak kien ikkundannat għal għaxar snin priġunerija.
Huma t-tnejn kienu membri ta’ kunsill tal-oppożizzjoni wara li l-President Lukashenko – li ilu fil-poter mill-1994 – insista li kien rebaħ l-elezzjoni polemikuża tal-2020 għall-Presidenza. Intant, il-proeskuturi akkużaw lill-kunsill inkwistjoni dwar ‘attentat għal kolp ta’ stat’, bil-qorti ta’ Minsk issib lil Kolesnikova u Znak ħatja dwar ‘estremiżmu’ u ‘reati kontra l-Istat.
Intant, l-imputati qed jiċħdu għall-akkużi u qed ifissru l-proċess tal-qorti bħala eżerċizzju qarrieqi. L-avukati tagħhom, intant, qalu li se jappellaw kontra l-verdett tal-qorti.
Il-poplu tal-Belarus ilu x-xhur jipprotesta kontra r-riżultat tal-vot għall-Presidenza li kien sar f’Awwissu tal-2020. Fl-istess ħin, l-Unjoni Ewropea, l-Istati Uniti u r-Renju Unit irreferew għall-elezzjoni bħala waħda ‘nieqsa mill-bilanċ jew proċeduri xierqa.’
Min-naħa tiegħu, Lukashenko qed jagħmel minn kollox biex iwaqqaf id-dissens, b’eluf ta’ dimostranti jispiċċaw imsawwtin u mitfugħin il-ħabs, u b’diversi politiċi tal-Oppożizzjoni jispiċċaw jgħixu f’eżilju barra l-pajjiż.
