Is-Soċjeta Fotoġrafika ta’ Malta bi pjaċir tħabbar is-56 edizzjoni tal-Kompetizzjoni u Esebizzjoni Nazzjonali tal-Fotografija, li hi l-quċċata tal-kompetizzjonijiet fotografiċi fil-Gżejjer Maltin. Is-Soċjeta’ tinsab onorata li kienet katalista fl-organizazzjoni ta’ din il-kompetizzjoni hekk prestiġjuża għal dawn l-aħħar 55 sena. Din il-kompetiżżjoni tkun mistennija b’ħerqa kbira, sena wara l-oħra, minn bosta dilettanti lokali tal-fotografija.
Il-parteċipanti jistgħu jissottomettu sa erba’ ritratti f’waħda mill-erba’ kategoriji jew inkella fil-kategoriji kollha. Il-kategoriji miftuħa huma dawk tar-ritratti ippreżentati bil-kulur u monokromatiċi ipprintjati, kif ukoll dawk tar-ritratti bil-kulur u monokromatiċi diġitali. Is-suġġetti li jittrattaw ir-ritratti sottomessi hija waħda miftuħa u għalhekk titħalla f’idejn il-parteċipanti. Dawk kollha li jixtiequ jieħdu sehem, huma mitluba sabiex jissottomettu ir-ritratti tagħhom sa mhux aktar tard mill-25 ta’ Settembru. Għall-ħabta ta’ nofs Ottubru dawk ir-ritratti ppreżentati u sottometti għall-kompetizzjoni, se jkunu qedgħin jiġu iġġudikati minn fotografi esperti fil-qasam, sakemm finalment, ix-xogħlijiet aċċettati jiġu esebiti ġewwa Palazzo De La Salle, fi Triq ir-Repubblika, il-Belt Valletta, bejn id-9 u 23 ta’ Diċembru.
Is-Soċjeta Fotoġrafika ta’ Malta hi organizazzjoni mmexxija mill-volontiera bl-għan li taqdi l-bżonnijiet ta’ dawk kollha interessati fl-arti fotografika. Sa mit-twaqqif tagħha 60 sena ilu, l-għanijiet tas-Soċjeta’ dejjem kienu li teduka u tipromwovi il-prattika u l-apprezzament lejn il-forom kollha tal-fotografija, li xxerred il-kelma dwar is-sbuħija tal-fotografija, kif ukoll li tassisti lil dawk li jixtiequ jimirħu f’dan il-mistjier sabiex jikbru u jiskopru kif l-aħjar jieħdu r-ritratti tagħhom. Ta’ min isemmi wkoll li s-Soċjeta Fotografika ta’ Maltatgawdi stima għolja minn bosta assoċjazzjonijiet u għaqdiet oħra li mhux l-ewwel darba li fittxew fiha l-appoġġ sabiex jittellgħu esebizzjonijiet fotografiċi f’pajjiżna.
Dawk kollha interessati li jipparteċipaw, huma mistiedna sabiex jidħlu fis-sit tas-Soċjeta’ www.mpsmalta.com u hemmhekk isibu kull informazzjoni relatata ma’ din il-Kompetizzjoni u Esebizzjoni Nazzjonali tal-Fotografija. Inħeġġu lil dawk interessati biex ma jħallux għall-aħħar u jaħtfu l-opportunita’ biċ-ċans li jkollhom ix-xogħolijiet tagħhom ippremjati u esebiti f’waħda mis-swali prominenti tal-arti.
