Żagħżugħ ta’ 22 sena, residenti Bormla ma ngħatax il-libertà proviżorja wara li wieġeb mhux ħati li weġġa’ lis-sieħba tiegħu Terry Muscat u kkaġunalha feriti gravi meta ta daqqa ta’ ponn f’imnieħirha. Meta Gareth Chlach sema’ lill-Maġistrat Lara Lanfranco tiċħadlu l-pleġġ huwa beda jgħajjat u jgħid “ma rridx immur il-ħabs’ u wara ta daqqa ta’ ras fuq bieb li kien viċin l-awla 25 fejn tressaq.
Huwa spiċċa bid-demm nieżel minn ma’ rasu. Ftit tal-ħin wara waslet ambullanza li mill-ewwel bdiet tagħtih it-trattament neċċessarju. Huwa ġie akkużat li nhar il-Ġimgħa, ikkawża ġrieħi gravi lis-sieħba tiegħu f’Bormla u heddidha li se tintuża l-vjolenza fil-konfront tagħha. Huwa ġie akkużat ukoll b’pussess tad-droga u li sar reċediv. Fil-Qorti, l-Ispettur Eman Hayman qal li l-vittma kellha ġrieħi gravi fi mneħirha kawża ta’ daqqa ta’ ponn.
Tenna li r-relazzjoni tagħhom kienet ilha għaddejja tmien xhur u li l-argument beda fuq l-użu tal-mobile tal-vittma. Kompla li l-imputat għandu problema tad-droga u li ġie arrestat it-Tnejn wara li mar minn jeddu fl-Għassa ta’ Bormla. Huwa għamel dan wara li l-vittma tellgħet filmat live fuq Facebook li fih allegat li kienet għadha kif ġiet aggredita f’darha.
Chalch ġie akkużat li aggredixxa lill-personalità tal-midja soċjali Terry ta’ Bormla wara tilwima u akkużat li weġġa’ gravi lil Muscat, insulentaha, heddiha, u li uża l-vjolenza kontriha waqt it-twettiq ta’ reat. Chlach ġie akkużat ukoll li kiser ordni ta’ probation. Huwa ċaħad l-akkużi.
L-avukat tiegħu, George Anton Buttigieg talab il-libertà proviżorja, iżda fl-aħħar mill-aħħar din ġiet miċħuda mill-qorti, li nnutat li l-akkużi kienu jittrattaw vjolenza domestika u li kien hemm biża’ reali li l-akkużat jersaq lejn l-uniku xhud. Id-difiża talbet li l-akkużat jinżamm fit-taqsima tal-forensika jew fis-sezzjoni tal-persuni vulnerabbli biex jiġi evitat li jiġi f’kuntatt ma’ ċerti individwi fil-ħabs li jikkawżawlu l-ħsara. “Se nispiċċa l-ħabs mgħallaq,” għajjat Chlach wara li ġiet miċħuda l-libertà proviżorja.
“Il-Ħabs se joqtluni, dan kollu fuq il-kuxjenza tiegħek, Spettur u se nispiċċa nitgħallaq hemmhekk,” huwa kompla. Il-Qorti ordnat li jiġi eżaminat minn tabib. Barra l-awla, id-drama kompliet tiżvolġi bl-akkużat jibki u jgħajjat li ma riedx imur il-ħabs.
F’ħin minnhom, huwa qam u ta bir-ras bieb tal-injam, u kkawża danni fuq rasu. “Hemm ħafna għedewwa tiegħi fil-ħabs, jekk immur hemm, joqtluni” qal lill-uffiċjali barra l-awla tal-qorti, waqt li kien qed jiġi ttrattat għall-ferita f’rasu. Huwa ttieħed għal aktar kura medika.
Id-difiża talbet għall-ħelsien mill-arrest, bil-Prosekuzzjoni toġġezzjona minħabba l-gravità tal-każ u l-biża’ ta’ kontaminazzjoni tal-provi. Il-Qorti ma laqgħetx it-talba mill-ħelsien mill-arrest u rrakkomandat lid-Direttur tal-Faċilità Korrettiva ta’ Kordin biex l-akkużat jinżamm fit-taqsima tal-forensika jew fit-taqsima għall-persuni vulnerabbli minħabba l-vizzju tad-droga.
