Raġel ta’ 23 sena mill-Gżira jinsab arrestat wara li minn tfittxijiet li saru fuqu u fil-madwar, instabu arma tan-nar, munizzjon u erba’ fjamingi mejta.
Fi stqarrija l-pulizija qalu li għall-ħabta tas-7.30am, il-Pulizija rċeviet rapport li fl-inħawi ta’ Fra Ben, il-Qawra, kienu għadhom kemm ġew sparati tiri fuq tajr protett. Il-Pulizija ġiet infurmata wkoll li fuq il-post kien hemm vettura li allegatament kienet tal-istess persuna li spara t-tiri.
Bl-assistenza tal-Forzi Armati ta’ Malta, ittellgħu tliet fjamingi mill-baħar, filwaqt li l-ieħor instab fuq il-blat.
Is-suspettat ittieħed fil-Kwartieri Ġenerali tal-Pulizija fil-Floriana u għadu qiegħed jinżamm għal aktar stħarriġ.
