Il-kowċ Taljan Claudio Ranieri mistenni jinħatar kowċ ta’ Watford fis-sigħat li ġejjin hekk kif mistenni jieħu post Xisco Munoz li tkeċċa minn kowċ tal-istess klabb fi tmiem il-ġimgħa.
Munoz rebaħ il-promozzjoni ma’ Watford fl-istaġun li għadda u tkeċċa wara biss għaxar xhur. Taħt it-tmexxija ta’ Munoz, Watford jinsabu fl-14-il post tal-klassifika. Ranieri se jkun qed jirritona fil-Premier League wara l-esperjenza tiegħu ma’ Leicester City fejn rebaħ il-kampjonat fl-2015-16.
Ranieri għandu esperjenza vasta hekk kif jekk jieħu t-tmexxija ta’ Watford, dan ikun il-21 klabb tiegħu f’karriera ta’ 35 sena. Fl-esperjenza tiegħu, Ranieri rebaħ tmien tazzi fosthom il-Coppa Italia u s-Super Cup ma’ Valencia.
Il-kowċ Taljan kien tkeċċa minn ma’ Leicester fl-2017 wara sensiela ta’ riżultati negattivi. Minn dakinhar, Ranieri kellu esperjenzi ma’ Nantes u Fulham.
