Deprio Basketball Club preżentaw il-pjanijiet tagħhom għall-istaġun il-ġdid fejn fost l-oħrajn preżentaw il-flokkijiet il-ġodda li se jkunu qed jużaw. Il-klabb wettaq ukoll tiġdid permezz tal-għajnuna ta’ Andrew Aquilina, Andy Attard, Claire Ciantar u Alexia Baldacchino.
Il-klabb matul ix-xhur tas-sajf żamm diskussjonijiet u laħaq ftehim mal-kowċ James Bamfield u Ruben Baldacchino fejn se jkunu qed iġeddu l-kuntratti tagħhom mal-iskwadra rispettivi. Il-klabb kompla jsaħħaħ l-iskwadra tal-irġiel permezz tal-akkwisti ta’ Alex Oriahki, Corey Henderson, Tyrin Quan u Finley Porter. Hannah Johnson għat-tielet sena konsekuttiva kienet ikkonfermata mal-iskwadra tan-nisa.
F’kummenti fuq l-istaġun il-ġdid, il-President tal-klabb Philip Attard qal li Deprio bħala klabb għandu storja twila fil-basketball f’pajjiżna fejn għal bosta snin kien qed jisfida għall-unuri ewlenin. Il-klabb mistenni jutilizza wkoll nurmu ta’ players li telgħin mill-akkademja kemm fl-iskwadra tal-irġiel u anke dik tan-nisa. L-għan tal-klabb huwa li jara li titjieb il-logħba tal-basketball f’pajjiżna.
