Is-sitwazzjoni eżistenti fix-xandir pubbliku kienet u għadha waħda inkwetanti.
Hekk sostna l-Viċi Kap tal-Partit Nazzjonalista David Agius f’konferenza tal-aħbarijiet it-Tlieta filgħodu indirizzata flimkien mal-Kandidata tal-PN għall-Eleżżjoni Ġenerali Alessia Psaila Zammit fejn insista li fl-aħħar jiem l-iskeda l-ġdida tal-istazzjon tal-ista, imħallas mit-taxxi tal-poplu xorta waħda ma ndirizzatx l-iżbilanċ fix-Xandir pubbliku, bi ksur sfaċċat tal-kostituzzjoni u tal-liġi.
David Agius insista li l-istazzjon ta’ TVM miżgħud bi propoganda kontinwa favur il-Gvern tal-Labour mingħajr ebda programmi li jagħtu lok għal diskors bilanċjat jew dibattiti bejn membri tal-Gvern u tal-Oppożizzjoni Nazzjonalista.
Dan filwaqt li l-Viċi Kap ta-Partit Nazzjonalista ddeskriva l-istazzjon il-ġdid TVMNEWS+ bħala strateġija maħduma bizzilla sabiex itambru l-messaġġ tal-Gvern ta’ Robert Abela.
Dan, kompla David Agius, li kemm is-sit elettroniku tax-Xandir tal-Istat, kif ukoll il-midja soċjali mifnija bi propoganda tal-Partit Laburista.
Huwa insista li fil-maġġorparti tal-każijiet fl-ewwel 8 minuti tal-bullettin ta’ filgħaxija,7 minuti minnhom jkunu ddedikati lill-Gvern Laburista filwaqt li l-Oppożizzjoni Nazzjonalista tiġi rrapportata ta’ fuq fuq jew saħansitra wara t-tmienja u nofs ta’ filgħaxija.
David Agius fakkar li filwaqt li l-Gvern Laburista għandu jiġi rrapportat, hekk ukoll mingħajr żbilanċ hemm bżonn li tiġi rrapportata l-Oppożizzjoni Nazzjonalista u l-proposti li qed tippreżenta lill-poplu, għaliex hemm eluf ta persuni li taw il-fiduċja lill-Partit Nazzjonalista, fatt li x-Xandir tal-istat jiprova jnessi.
Il-kandidat għall-elezzjoni Alessia Psaila Zammit spjegat li d-deskrepanza bejn ir-rappurtaġġi rigward il-Partit Laburista jisbqu sew dawk tal-Partit Nazzjonalista fuq ix-Xandir Pubbliku. Hija saħqet li fl-aħħar ġimgħa, fi tlett ijiem minnhom il-Gvern ingħata aktar minn 50% tal-ispazju fuq l-aħbarijiet ta’ filgħaxija u jumejn oħra b’aktar minn 40%. Dan filwaqt li l-Partit Nazzjonalista l-aktar li ingħata spazju kien ftit inqas minn 11%.
Hija saħqet li fl-aħħar jiem il-Ministru responsabbli mix-Xandir, Carmelo Abela, wera biċ-ċar li dak li qed iseħħ hu xi ħaġa inkwetanti fil-kamra tal-aħbarijiet ta’ TVM wara li għadda kummenti dwar x’inhu news value jew le, bħal donnu jrid jindaħal.
Hi saħqet ukoll li l-Partit Nazzjonalista mhux jeskludi li jittieħdu azzjonijiet legali u spjegat li l-Partit ressaq ilment mal-awtorità tax-xandir.
Dan filwaqt li ġie ċċarat li l-Partit Nazzjonalista mhux kontra l-ħaddiema tal-PBS li jaħdmu u jistinkaw lejl u nhar iżda l-imġieba tal-Gvern ta’ Robert Abela u tat-tmexxija tax-Xandir tal-Istat. Huma appellaw lill-Awtorità tax-Xandir sabiex verament il-pubbliku jkun offrut l-informazzjoni kollha possibli kif jixraqlu.
Semmiet kif il-Partit Nazzjonalista, ressaq ilment mal-Awtorita’ tax-Xandir hekk kif ma xxandritx fuq l-PBS tweġiba tal-Oppożizzjoni għal dak li qalet il-kumpanija privata Steward Health Care, b’reazzjoni għall-kawża dwar l-isptarijiet li kien fetaħ id-Deputat Adrian Delia. L-istqarrija kienet elenkat tmien punti dwar investiment li suppost sar fl-isptarijiet.
Dan in-nuqqas minn naħa tal-PBS, li jirrapporta tweġiba tal-Oppożizzjoni u b’mod partikolari dwar tema li tolqot li kulħadd – is-saħħa – huwa mod ieħor kif l-aħbarijiet tal-istazzjon nazzjonali jagħżlu x’aħbarijiet iwasslu lill-poplu – aħbarijiet li jaġevolaw lill-Gvern u jimminaw l-ħidma tal-Oppozizzjoni.
Il-Partit Nazzjonalista se jibqa’ impenjat, kif diġa’ qed jagħmel, li jieħu kull azzjoni għad-dispożizzjoni tiegħu biex jaċċerta li r-rwol tiegħu bħala Oppożizzjoni, inkluż r-rwol li għandu li jaċċerta li r-riżorsi mħallsa minnha lkoll jintużaw b’mod bilancċat mill-istazzjon nazzjonali, jissaħħaħ.
