Żagħżugħ ta’ 21 sena minn Ħal Tarxien ingħata probation għal tliet snin wara li ammetta li bejn is-Sibt u l-Ħadd li għadda seraq diversi armi u munizzjon li huma relatati ma’ dixxiplini sportivi minn maħżen ta’ ħanut fil-Fgura. Brandon Savona ammetta li seraq diversi oġġetti li jiswew eluf ta’ ewro u li dawn jinkludu pistoli u snieter tal-arja, magazines u oġġetti oħra. Huwa ġie arrestat wara li sid il-ħanut tahom informazzjoni dwar min seta’ kien dak li wettaq is-serqa.
L-Ispettur Christina Delia li flimkien ma’ l-Ispettur Sarah K. Zerafa mexxiet il-Prosekuzzjoni qalet li waslu għall-akkużat ukoll permezz ta’ filmati tas-CCTV. Is-serqa saret f’maħżen fi Triq il-Merħba. Meta l-Pulizija marru fuq il-post skoprew li xi ħadd kien sgassa l-bieb tal-maħżen u minn ġo fih insterqu l-oġġetti. Dawn instabu fid-dar ta’ Savona. L-Avukat tiegħu Lennox Vella qal li din kienet ‘bravata’ li wettaq il-klijent tiegħu f’għeluq sninu.
Tenna li Savona m’għandux problema ta’ droga u li għandu kondotta netta. Tenna wkoll li l-problema tiegħu hija relatata max-xogħol. Saħaq ukoll li l-ġenituri tiegħu, preżenti fl-awla jinsabu nkwetati dwar dak li għamel binhom. Huwa talab biex jiġi nominat uffiċjal tal-probation biex isegwih, fejn miegħu qablet il-Prosekuzzjoni, sakemm din tkun fil-massimnu tagħha. Il-Maġistrat Charmain Galea avżat liż-żagħżugħ li probation xorta se tidher fuq il-kondotta tiegħu, madankollu mhux se jħammiġha bħal li kieku jingħata sentenza ta’ ħabs.
Qaltlu wkoll li l-uffiċjal tal-probation se tmexxih u jrid joqgħod għal dak li tgħidlu, għax jekk isir rapport bil-kontra. Wissietu wkoll li każ bħal dan għandu piena massima ta’ seba’ snin ħabs. Il-Qorti fis-sentenza tagħha qieset l-ammissjoni bikrija ra’ Savona u l-fatt li rritorna l-oġġett kollha misruqa.
//= $special ?>