Marka tas-saba’ wieħed fuq il-ħġieġa ta’ gabbana pubblika tas-Sliema li nkisret ma kinitx biżżejjed biex tikkundanna ħalliel suspettat. Keith Joseph Mallia ta’ 50 sena g]adda kumpilazzjoni fuq l-allegat involviment tiegħu fuq serqa fil-lejl tat-13 ta’ Diċembru tal-2015.
L-għada filgħodu, impjegat fil-kiosk irrapporta li l-bieb kien bil-ħsara u li kien hemm il-magna tal-bejgħ tat-‘top-up’ mobiles u ammont ta’ flus kontanti neqsin. Rappreżentant tal-kumpanija li għandha l-magna tal-bejgħ xehed li l-valur tal-magna, inklużi l-ispejjeż tad-dwana u tat-trasport, kien jammonta għal €3,700.
Esperti forensiċi aktar tard ikkonfermaw li marka tas-saba’ fuq il-ħġieġa tal-kiosk fix-Xatt ta’ Tas-Sliema kienet taqbel ma’ dik tas-saba’ tan-nofs tax-xellug tal-akkużat. Madankollu, taħt interrogazzjoni, Mallia ċaħad l-involviment u sostna li kien rieqed id-dar fil-ħin tal-allegat inċident u ma kellu l-ebda idea tal-post tal-kiosk.
Mistoqsi dwar il-marki tas-swaba huwa wieġeb, “Kif għandi nkun naf? Qiegħed iġennini. ” It-tifel u ħabib ta’ Mallia kienu t-tnejn akkużati b’involviment fis-serqa. Fuq l-evidenza mressqa, il-qorti staqsiet jekk marka tas-swaba’ solitarja kinitx biżżejjed biex tipprova l-akkużi lil hinn minn dubju raġonevoli.
Il-Maġistrat Claire Stafrace Zammit osservat li ma kien hemm l-ebda prova dwar jekk il-marka kinitx miġbura min naħat interni tal-kiosk. Il-prosekuzzjoni ma rnexxilhiex tipprova li l-evidenza kienet tindika direzzjoni waħda, jiġifieri li l-akkużat kien involut fl-isgass, anke fid-dawl tal-fatt li l-kiosk kien post pubbliku.
Fid-dawl ta’ konsiderazzjonijiet bħal dawn, il-qorti lliberat lill-akkużat minn kull responsabbiltà kriminali. L-avukati Franco Debono u Francesca Zarb kienu l-avukati difensuri.
