Pensjonant li allegatament ikkorrompa tfajla ta’ 15-il sena fdata fi-kura tiegħu bħala kowċ sportiv, inżamm taħt arrest preventiv wara li tressaq il-Qorti tard it-Tnejn filgħaxija. L-akkużat kien diġà nstab ħati li kkorrompa minorenni fis-snin sebgħin.
Ir-raġel, li ismu ġie pprojbit fuq talba mill-prosekuzzjoni biex tissalvagwardja l-identità tat-tifla, wieġeb mhux ħati tal-atti mhux kunsenswali, ta’ korruzzjoni ta’ minorenni kif ukoll li ripetutament ssuġġetta lill-vittma vulnerabbli għal tali aġir offensiv, umiljanti, degradanti u intimidanti.
L-Ispettur John Spiteri li mexxa l-Prosekuzzjoni qal lill-Qorti li l-abbuż suspettat kien irrappurtat mill-Aġenzija Appoġġ wara li t-tifla fetħet qalbha dwar il-kalvarju tagħha, u qalet lill-ħaddiema soċjali kif kienet sofriet l-avvanzi sesswali tar-raġel għal xhur qabel ma ressqet rapport. Ir-raġel kien jitlobha biex jakkumpanjaha għat-taħriġ u lura d-dar. Iżda waqt li kienet waħedha miegħu huwa allegatament kien imissilha sidirha u jpoġġi idu bejn saqajha fuq il-qalziet tagħha.
It-tfajla kienet tgħidlu biex jieqaf imma kien iwissiha biex ma tgħid lil ħadd biex ma ġġibux fl-inkwiet. It-tifla fl-aħħar mill-aħħar kellha bżonn l-għajnuna minn psikjatra taż-żgħażagħ wara li allegatament uriet ħsibijiet ta’ suwiċidju, ġiet infurmata l-qorti.
Talba għal pleġġ qanqlet sottomissjonijiet twal u animati miż-żewġ partijiet hekk kif il-prosekuzzjoni argumentat li l-proċedimenti kienu għadhom fi stadju prematur ħafna u kien hemm biża’ reali ta’ tbagħbis tal-evidenza. Barra minn hekk, kien hemm riskju ta’ aktar atti kriminali, sostniet l-Avukat tal-AĠ Angele Vella, li informat lill-qorti, ippreseduta mill-maġistrat Marse-Ann Farrugia, li l-akkużat kien instab ħati ta’ korruzzjoni ta’ minorenni lura fis-snin sebgħin.
Waqt l-arrest tiegħu nhar il-Ħadd, il-pulizija sabu wkoll ritratt fit-telefon tiegħu li allegatament kien ħa ta’ żewġ tfajliet żgħar li kienu għaddejjin fit-triq. Meta kkonfrontat b’dik l-immaġini, ir-raġel sempliċement tbissem u baqa’ kalm, qalet l-avukat tal-prosekuzzjoni, u saħqet li l-karattru tar-raġel ma kienx affidabbli.
L-avukati difensuri Franco Debono u Richard Sladden irribattaw li l-akkużat kien ikkoopera bis-sħiħ mal-investigaturi u kien lest li jissottometti ruħu għal superviżjoni minn uffiċjal tal-probation jew psikjatra kif il-qorti qieset xieraq. Kemm il-minuri kif ukoll ommha ma xtaqux jirrappurtaw il-kwistjoni lill-pulizija, irrimarkat id-difiża.
Barra minn hekk, li l-fatt li l-allegata l-vittma ma nġibitx biex tixhed kienet tfisser li l-persuni mressqa l-qorti jispiċċaw miċħuda l-libertà proviżorja sakemm l-allegata vittma ma tkunx barranija li tixhed immedjatament qabel ma titlaq mill-gżira.
“Dan ifisser li l-liġi qed toħloq żewġ kategoriji ta’ individwi,” sostna Debono, filwaqt li saħaq li kien ilu jippromwovi emendi legali meħtieġa biex tiġi indirizzata din il-kwistjoni. Iżda l-prosekuzzjoni baqgħet soda bl-oġġezzjonijiet tagħha. L-allegat “mess” kellu effett serju fuq it-tifla, sostna Spiteri.
“U xi ngħidu għad-drittijiet tal-vittma? Min għandu joqgħod għad-drittijiet tagħha?” żiedet l-avukat tal-AG. Fl-aħħar mill-aħħar, il-qorti ċaħdet il-ħelsien mill-arrest fid-dawl tar-riskju ta’ tbagħbis, il-gravità tal-akkużi, il-kondotta kriminali tal-akkużat u l-fatt li xhieda ċivili, inkluż il-minuri, kienu għad iridu jixhdu.
