“Il-gvern għandu jestendi l-grant tal-karozzi elettriċi għall-vetturi second-hand. Il-Ministru tat-Trasport Ian Borg għandu jieħu dan il-parir tal-Partit Nazzjonalista jekk irid jiżgura suq miftuħ ħieles u ġust.” Hekk sostna David Thake, il-Kelliem għall-Ekonomija l-ħadra u proġetti kapitali tal-Partit Nazzjonalista.
Dan hekk kif Transport Malta wissiet li qed tippjana li teskludi lil ċerti importaturi minn skema ta’ għotjiet minħabba żidiet f’daqqa fil-prezzijiet. Il-Partit Nazzjonalista jirrimarka li esklużjoni bħal din, filwaqt li tkun intenzjonata, se tirriżulta f’nuqqas ta’ għażla għax-xerrejja.
Transport Malta wkoll m’għandhiex ir-riżorsi u mhix l-awtorità kompetenti biex tiżgura kompetizzjoni ġusta. Għalhekk Transport Malta effettivament se tippenalizza lix-xerrej u mhux lill-bejjiegħ għax jekk trid tip speċifiku ta’ karozza elettrika, sempliċement issa jkollok tixtriha mingħajr l-għotja.
