L-Afganistan, fil-preżent, qed jiffaċċja l-akbar kriżi umanitarja fid-dinja, bis-sitwazzjoni qed taqleb dejjem għall-agħar mindu l-militanti Iżlamiċi tat-Taliban ħatfu lura l-poter fil-pajjiż, f’Awwissu li għadda.
U waqt li l-familji Afgani qegħdin ibatu minn ġuh terribbli, il-pajjiż irid jiffaċċja sitwazzjoni ddisprata ta’ falliment finanzjarju. Dan meta twaqqfu l-fondi internazzjonali li kienu qed isostnu l-ekonomija fraġli tal-Afganistan, bid-dinja qed tiddibatti kif għandha tikkonfronta lir-reġim Talibani.
Sadanittant, in-Nazzjonijiet Uniti ħarġet twissija urġenti li miljuni ta’ Afgani se jilħqu jmutu f’każ li ma tintbagħatx immedjatament l-għajnuna lejn l-Afganistan.
