Erba’ tfal fost grupp ta’ immigranti mietu mgħarrqin waqt li kienu qed jippruvaw jaqsmu mit-Turkija lejn il-Greċja. It-traġedja seħħet meta għerqet dgħajsa li kienet mgħobbija b’talanqas 30 immigrant ftit ‘il hinn mill-gżira Griega ta’ Chios.
Il-Greċja hi waħda mill-aktar rotot ‘favoriti’ għall-immigranti li jridu jaqsmu lejn l-Unjoni Ewropea bil-għan li jingħataw kenn politiku. Intant, il-vjaġġi perikolużi naqsu sew fl-aħħar snin u t-traġedji ta’ dan it-tip saru pjuttost rari.
Il-Ministru Grieg responsabbli mill-Immigrazzjoni, Notis Mitarachi, qal li l-erbat itfal kellhom bejn it-tlieta u l-14-il sena. Intant, 22 persuni oħra kienu salvati, fost rapporti li hemm talanqas immigrant nieqes fost in-nies abbord id-dgħajsa. Ma ngħatatx informazzjoni dwar in-nazzjonalità tal-immigranti.
Intant, il-Ministru Mitarachi tkellem dwar ‘l-isfruttar tal-immigranti mill-gruppi kriminali fil-Baħar Eġew’ u meta t-traffikanti qed jużaw id-dgħajjes li mhumiex attrezzati għal dawn il-vjaġġi. Dan wara li madwar għaxar bastimenti u żewġ ħelikopters assistew fis-salvataġġ tal-immigranti ‘il hinn minn Chios.
