Koppja li 33 sena ilu tilfet tifel minħabba żball f’riżultat ta’ test tad-demm ingħatat kważi €64,000 f’kumpens mill-Qorti tal-Appell. Andrew u Maria Brincat kienu fetħu kawża kontra l-Uffiċjal Mediku Ewlieni tal-Gvern, is-Supretendent tal-Isptar San Luqa, u membri tal-Kabinett ta’ dak iż-żmien, inkluż il-Ministru tas-Saħħa.
Fil-Qorti ntqal li fl-ewwel tqala tagħha l-mara kienet għamlet test tad-demm li weriha bħala A Rhesus Positive, u f’Ġunju tal-1987 welldet tarbija b’saħħitha. F’Mejju tas-sena ta’ wara, meta kienet tqila bit-tieni wild tagħha, sar test tad-demm ieħor, li din id-darba wera A Rhesus Negative.
Intqal li r-riżultat tal-ewwel test kien għalhekk żbaljat, b’konsegwenza li matul it-tieni tqala l-mara ma ngħatatx it-trattament magħruf bħala Anti-D, li huwa meħtieġ biex il-mara tipprevjeni milli tipproduċi antikorpi li jagħmlu ħsara lill-ċelluli ħomor tat-tarbija.
B’riżultat ta’ dan in-nuqqas, il-koppja stqarret li f’Lulju tal-1988 it-tarbija tagħhom twieled mejjet. Aktar minn hekk, minħabba dak li għaddiet minnu l-mara f’din it-tqala, kull tqala futura tkun ikkumplikata. Minħabba l-bżonn ta’ din l-attenzjoni partikolari, fit-tielet tqala tagħha, il-mara marret barra biex tingħata l-kura meħtieġa fir-Renju Unit, bl-ispejjeż mediċi jitħallsu mill-Gvern Malti.
Il-koppja Brincat talbet kumpens mill-awtoritajiet Maltin biex ikopru d-danni li sofrew f’diversi aspetti, fosthom ir-rilokazzjoni tal-familja fir-Renju Unit u l-ispejjeż li rriżultaw f’dan ir-rigward. Fl-2016 l-ewwel Qorti kienet ikkonkludiet li kien hemm nuqqasijiet fis-sistema tas-saħħa pubblika, u li ma kienx hemm sistemi ta’ prevenzjoni biex jiġu evitati żbalji serji li ħallew effett serju fuq il-ħajja tan-nies.
Għaldaqstant il-Qorti ordnat kumpens ta’ €20,400 li kien jinkludi, fost oħrajn, spejjeż li saru waqt it-tieni tqala, id-differenza fl-għoli tal-ħajja bejn Malta u Londra, u kumpens għall-mewt tat-tarbija fil-ġuf. Il-koppja appellaw is-sentenza u argumentaw li ħaqqhom aktar, u kellhom jiġu kkumpensati għat-telf ta’ qligħ tal-mara, it-telf ta’ qligħ tar-raġel, l-effetti kkawżati minn dewmien fis-seduta tal-qorti, u danni morali.
Il-Qorti tal-Appell, preseduta mill-Prim Imħallef Mark Chetcuti u l-Imħallfin Joseph R. Micallef u Tonio Mallia, irrevedew id-deċiżjoni tal-ewwel Qorti dwar l-impjieg tal-mara u ddeċidew li hija kellha tingħata €23,294 kif ikkalkulati minn espert legali.
Il-qorti tal-Appell iddeċidiet li ma kinitx il-Qorti kompetenti li tiddeċiedi dwar kumpens għal dewmien, iżda fir-rigward tad-danni morali, ikkonkludiet li l-koppja għandha tingħata €20,000. B’hekk il-kumpens totali li għandu jingħata lill-koppja Brincat mill-awtoritajiet tas-saħħa aktar mit-triplika għal €63,667.
