Vantaġġ doppju fl-ewwel taqsima kien biżżejjed għal Wolves biex bit-tlett punti mirbuħa telgħu fis-seba’ post b’16 il-punt daqs Brighton & Hove Albion b’Everton jibqgħu fl-għaxar post flimkien ma’ Leicester City b’14 il-punt. Fil-15 il-minuta gowl ta’ Hee Chan Hwang għal Wolves ma kienx ikkonvalidat bil-VAR. Madankollu fit-28 minuta Wolves marru fil-vantaġġ meta minn azzjoni ta’ Rayan Ait Nouri kien MAX KILMAN li bir-ras għeleb lil Jordan Pickford. Everton naqsu milli jwettqu reazzjoni b’Wolves approfittaw meta Ben Godfred ikklerja ħażin. Approfitta RAUL JIMANEZ li mill-ġdid għeleb lil Pickford għal vantaġġ doppju sa tmiem l-ewwel taqsima. B’Everton aktar fil-partita, fil-61 minuta naqqsu l-iskor permezz ta’ ALEX IWOBI li minn azzjoni ta’ Michael Keane għeleb lil Jose’ Sa għat-2 – 1 .
