Il-protagonisti tal-aħħar sena u nofs ta’ pandemija – jiġifieri l-frontliners il-paramediċi u membri tal-forzi tal-ordni – intesew għal kollox mill-budget ta’ Robert Abela…dan minkejja li lkoll nafu li dawn il-ħaddiema għadhom għaddejjin minn mument ta’ prova.
Sostna dan il-Kelliem għall-Intern u Sigurtà Nazzjonali Beppe Fenech Adami f’konferenza tal-aħbarijiet it-Tlieta filgħodu, indirizzata flimkien mal-Kelliem għall-Gvern Lokali Karl Gouder, fejn saħaq li Gvern ġdid Nazzjonalista jerġa’ jsaħħaħ il-Korp tal-Pulizija sabiex verament kull uffiċjal ikun kburi bl-arma li jservi billi tintemm l-era tal-impunità.
Dan hekk kif id-Deputat Nazzjonalista insista li l-Gvern tal-Labour wassal sabiex il-membri tal-korp ikunu demoralizzati minhabba li kellhom eks Kummissarju tal-Pulizija li spiċċa jikkonfoffa li kien involut ma’ nies li b’xi mod kellhom x’jaqsmu mal-assassinju ta’ Daphne Caruana Galizia, u Assistenti Kummissarji li komplew ikattru l-impunità f’pajjiżna.
Beppe Fenech Adami saħaq li ankè fi kliem l-Ombudsman, taħt Gvern tal-Labour ma ngħatawx promozzjonijiet lil min ħaqqu sabiex ikomplu jilgħabu l-logħoba maħmuġa ddettata minn Kastilja.
Għad-differenza ta’ dan kollu….. l-Partit Nazzjonalista jwiegħed titjib fil-kundizzjonijiet tax-xogħol li jirriflettu s-sitwazzjoni soċjali preżenti, fosthom żieda fl-ingaġġ ta’ uffiċjali ġodda.
Huwa insista li Gvern ġdid Nazzjonalista jagħti widen ukoll lill-Forzi Armati hekk kif qatt ma kellna s-sitwazzjoni li għandna illum filwaqt li saħaq ukoll li ankè l-gwardjani tal-ħabs għandhom bżonn kull sostenn kawża tas-sitwazzjoni prekarja li preżentament il-ħabs jinsab fih…. minħabba n-nuqqas ta’ responsabbilità merfugħha mill-Ministru Byron Camilleri.
Karl Gouder minn naha tieghu sostna li huwa element pożittiv li Gvern Laburista mexa fuq il-proposti tal-Partit Nazzjonalista li jkun hemm community policing iżda insista li hemm bżonn li din tkun imsaħħa u preżenti fil-lokalitajiet kollha.
Madanakollu d-Deputat Nazzjonalista saħaq li dan ma jfissirx li jingħalqu l-Għasses tal-Pulizija f’numru ta’ lokalitajiet bħal ma huwa qiegħed iseħħ bhalissa.
Filwaqt li spjega li f’pajjiżna m’hawn ebda sinjal tal-eżistenza ta’ green wardens, Karl Gouder qal li hemm bżonn li jiġu msaħħa l-kunsilli lokali. Filwaqt li fakkar kif issa l-Kunsilli spiċċaw jokorbu lil-LESA ghall-gwardjani.
Għaldaqstant huwa insista li Gvern ġdid Nazzjonalista jassigura li l-gwardjani lokali jingħataw kundizzjonijiet tax-xogħol li jixraqilhom, taħriġ kontinwu, kif ukoll li r-resident ikun moqdi b’serjetà.
