- Mario Galea, Deputat Nazzjonalista
Id-Deputat Nazzjonalista Mario Galea qal fil-parlament li jkun żball kbir jekk xi ħadd jipprova jippolitiċċizza s-settur tad-drittijiet, it-trobbija u s-saħħa tal-annimali.
Wasal iż-żmien li l-Kummissarju għad-Drittijiet tal-Annimali jkollha aktar poteri eżekuttivi. Din għandha bżonn ta’ aktar riżorsi umani għaliex minkejja li jidħlulha għadd ġmielu ta’ rapporti u li jridu jkunu investigati fil-postijiet indikati, qed jiġri li din m’għandhiex riżorsi umani biżżejjed biex taħdem.
Mario Galea ikkundanna kull abbuż fil-konfront tal-Kummissarju għad-Drittijiet tal-Annimali u qal li kull abbuż għandu jkun investigat minnufih u bla ħala ta’ żmien.
Hu qal li Alison Bezzina fil-kariga tagħha ta’ Kummissarju għad-Drittijiet tal-Annimali tat ħafna leħen lill-annimali u jalla dan ix-xogħol tajjeb jissokta.
Il-krudeltà tal-annimali naqset ħafna, iżda xorta waħda fadal ħafna xi jsir. Għandu jkun hawn kontroll strett fir-rigward ta’ dawk li jrabbu lill-annimali biex ikollhom iż-żgħar minnhom għal skop ta’ bejgħ.
Anki l-Pulizija għandha tieħu l-passi fil-konfront ta’ min jara jikser il-liġi għaliex ma jkunx qed jitratta l-annimali sew.
Anki l-Qrati għandhom jagħtu sentenzi severi fir-rigward tal-moħqrija tal-annimali. Ċerti sentenzi li jingħataw inisslu rabja kbira.
L-annimali qatt m’għandhom jintużaw għall-pjaċir tan-nies. Ma jagħmilx sens li jingħataw permessi għaz-zoo f’pajjiżna. U ċerti annimali li għandna f’pajjiżna u li jinsabu fir-riskju li jispiċċaw minn wiċċ id-dinja, kif jista’ jkun li spiċċaw hawnhekk.
Aħbar interessanti li għadha qed timmatura hi dwar xi ħadd li jrabbi l-iljuni fil-basement tiegħu.
Issa anki sriep velenużi qed jiddaħħlu f’Malta u qisu m’hu qed jiġri xejn.
Mario Galea tajjeb li xi ħadd jagħmel il-mistoqsija dwar x’jiġi l-ewwel: il-voti jew il-ġlieda kontra l-moħqrija tal-annimali.
Hu temm jappella lil dawk kollha li jħobbu l-annimali biex ma jżurux iz-zoos u fejn jinżammu l-annimali eżotiċi. L-esplojtazzjoni tal-annimali għandha tinqata’ darba għal dejjem.
Tkellem ukoll dwar il-pet shops u staqsa fejn huma l-istandards li suppost għandhom ikunu kkonservati.
Filwaqt li qal li l-qtates m’għandhomx jintużaw bħala mezz biex jinqabdu l-ġrieden u allura jkun hemm min ma jitmax lill-qtates.
Hu qal li għandha ssir riforma għar-rigward ta’ kif jaħdem l-Animal Walfare. Dan id-Direttorat għandu bżonn ta’ aktar riżorsi umani u l-istess ħaddiema għandhom ikunu mgħammra b’body cams. Hemm bżonn wkoll ta’ aktar riżorsi bħal ambulanzi u ta’ aktar apparat li jirrifletti l-bżonnijiet tal-lum.
Temm jitkellem dwar l-għaqdiet volontarji li jaħdmu fost l-annimali u qal li l-Gvern għandu japprezza ħafna x-xogħol li qed iwettqu dawn is-santwarji.
Għandu jkun hemm kontroll fuq il-prezzijiet tal-mediċini fejn hemm suspetti serji dwar prezzijiet esaġerati.
