Il-Kabinett ta’ Robert Abela għadu sal-lum il-ġurnata skomdu jwieġeb dwar l-eks Ministru u eks Deputat Mexxej Konrad Mizzi. U meta mistoqsijin dwaru l-espressjoni tagħhom tkun kollox minbarra “wiċċ il-hena”.
Dan ħareġ fid-deher ma kull Ministru li tkellimna mieghu fl-aħħar ġimgħat rigward dak li seħħ tul it-tmexxija tal-eks Prim Ministru Joseph Muscat u l-persuna li mexa miegħu spalla ma’ spalla f’kull proġett kapitali ewlieni li ssawwar minn flus il-poplu; deals bħal tal-powerstation tal-Electrogas u tal-Vitals b’miljuni ta’ ewro għadhom qed jinsterqu minn but il-poplu Malti u Għawdxi..deals ikkundannati saħansitra mill-Awditur Ġenerali.
Illum kien imiss lill-Ministru Julia Farrugia Portelli li b’mod skomdu ma setgħetx twieġeb ċar u tond dwar Mizzi.
Dan hekk kif, wara l-isteriżmu ta’ Konrad Mizzi l-Erbgħa waranofsinhar hekk kif tela suppost iwieġeb quddiem il-Kumitat tal-Kontijiet Pubbliċi, Julia Farrugia ….mistoqsija għal darba tnejn temminx kliem l-eks Ministru Laburista… ma kkomettietx ruħha, u insistiet li tagħtih iċ-ċans. Dan filwaqt li saħqet li huwa fi dmir iwieġeb għall-mistoqsijiet li sarulu mill-PAC…minkejja li fil-verità għal sagħtejn sħaħ…tkellem hu biss.
“Ministru inti temmnu lil Konrad Mizzi? Jiena lil Konrad Mizzi nagħtih iċ-ċans li kif inhu fi dmir li jagħmel iwieġeb għal mistoqsijiet inkluż dak li sarulu ilbierah fil-Public Accounts Committe”
Mistoqsija temminx li huwa minnu li Konrad Mizzi hu nadif, hija saħqet li dik tiddeċidieh il-Qorti u mhux hi, minkejja li għal għajn in-nies il-Partit Laburista għamel ta’ bir-ruħu li Mizzi twarrab minnu ….minkejja li kemm il-Gvern ta’ Abela kif ukoll l-midja tal-propoganda tal-Labour għadhom isibuha bi tqila biex ma jibqgħux jiddefenduh.
Meta mistoqsija sabiex twieġeb dwar dan l-aġir, il-Ministru nħbiet wara l-kodiċi tal-Partit li tappartjeni għalieh minkejja li Konrad Mizzi kien u għadu jirrappreżenta l-legat tat-tmexxija Laburista.
“Il-Partit Laburista għandu il-kodiċi tiegħu ta’ kif għandu wieħed iħares lejn l-affarijiet il-ġudizzju sar u d-deċiżjonijiet li kellhom jittieħdu ttieħdu f’dak iż-żmien opportun. Jiġifieri kiser xi kodiċi? Jien qed ngħidlek li d-deċiżjonijiet ittieħdu”
Intant, Julia Farrugia Portelli kompliet issaħħan il-qiegħa fir-raba’ distrett elettorali hekk kif tat x’tifhem li Mizzi se jkun kandidat għall-elezzjoni ġenerali li jmiss.
“Konrad Mizzi huwa kandidat u wkoll Membru Parlamentari Indipendenti u jekk għandek mistoqsijiet tista’ tagħmilha faċilment lilu. Ħa joħroġ għal elezzjoni taf xi ħaġa? Għax qed tgħid li huwa kandidat. Jiena minix spokesperson la ta’ Ministru ieħor imma tiegħi innifsi u dik il-mistoqsija nissuġerilek li tagħmilha lil Konrad Mizzi”
Dikjarazzjoni li turi biċ-ċar kemm Konrad Mizzi għadu jinħass parti waħda minnhom meta saħansitra alludiet li Konrad Mizzi għadu jżomm pożizzjoni ta’ Ministru.
