Il-pulizija fi Houston (Texas) fetħu investigazzjoni kriminali dwar l-imwiet ta’ persuni (nhar il-Ġimgħa) waqt rassa kbira li nħolqot matul l-ewwel lejl tal-Astroworld festival li hu fost l-aktar avvenimenti mużikali mistennija tas-sena.
L-avveniment kien qed ikun organizzat fi Houston u f’din ir-rassa mietu talanqas tmien persuni, b’għaxieren oħra jweġġgħu u jispiċċaw l-isptar għall-kura. L-etajiet tal-vittmi jvarjaw bejn l-14 u s-27 sena u fl-aħħar sigħat kellhom ikunu pubblikati l-identitajiet ta’ uħud minnhom.
Il-pulizija qed tinvestiga wkoll rapporti li xi persuna jew persuni fl-udjenza ‘kienu qed jinjettaw lin-nies bid-droga’ qabel seħħet it-traġedja. Ir-rassa, intant, kienet xprunata mill-paniku tan-nies li kienu qed jippruvaw javviċinaw il-palk tal-kunċerti f’ħin meta l-kantant rapper Travis Scott kien qed jinterpreta wħud mis-suċċessi tiegħu. L-awtoritajiet spjegaw li kien hemm ħinijiet fejn is-sitwazzjoni saret ‘inkontrollabbli’ u li kellhom jissarrfu fl-aktar konsegwenzi traġiċi.
