Is-sejħa interna għal assistent kummissarju hija waħra “ta’ natura diskriminatorja”, qalet il-Malta Police Union hekk kif irreġistrat tilwima industrijali mal-Kummissarju tal-Pulizija Angelo Gafà.
Il-union qalet li s-sejħa li ħarġet fil-5 ta’ Novembru u li se tibqa’ miftuħa sas-26 ta’ Novembru, tgħid li se tingħata konsiderazzjoni xierqa lill-applikanti li “għandhom għarfien u esperjenza ta’ xogħol rilevanti ppruvata f’investigazzjonijiet ta’ kriminalità finanzjarja” – Dan, qalet l-MPA, huwa diskriminatorju ma’ uffiċjali li qatt ma servew fil-qasam tal-kriminalità finanzjarja.
Din is-sejħa teħtieġ ukoll li l-applikanti jissottomettu ”pjan ta’ tliet snin li jiddeskrivi viżjoni għal qasam operattiv speċifiku tal-għażla tagħhom, li jinkorpora elementi ta’ investigazzjonijiet ta’ kriminalità finanzjarja…” Dwar dan l-MPA rrimarkat li filwaqt li s-sejħa ħarġet bħala waħda ġenerali, tinkludi elementi speċifiċi li ftit uffiċjali biss huma familjari magħhom u li huma miksuba biż-żmien u l-esperjenza professjonali.
Fid-dawl ta’ dan, l-MPA qed titlob li l-ispeċifikazzjoni għall-kriminalità finanzjarja għandha jew titneħħa jew tinħareġ sejħa speċifika għal kummissarju ta’ assistenza fil-qasam tal-kriminalità finanzjarja.
