Il-pajjiżi tad-dinja – partikolarment l-Istati Ewropej – qed ikomplu jaħdmu fuq programmi ta’ restrizzjonijiet fid-dawl tal-firxa tal-varjant Omicron.
Dan meta l-Gvernijiet u l-awtoritajiet tas-saħħa qed ikomplu janalizzaw l-aħjar strateġiji li jnaqqsu l-impatt tal-varjant, bl-Omicron qed ifeġġ u jinfirex f’dejjem aktar pajjiżi.
Ir-Renju Unit hu fost l-aktar pajjiżi li qed jindirizzaw din il-kriżi tas-saħħa b’mod qawwi – fost konferma, sigħat ilu, li n-nies li qed jivvjaġġaw lejn dan il-pajjiż iridu jieħdu test tal-Covid qabel il-vjaġġ, Dan filwaqt li deħlin dejjem aktar regoli bil-għan li titnaqqas il-firxa tal-Omicron fl-artijiet Britanniċi.
In-nies li qed jaslu fir-Renju Unit minn barra jridu wkoll jagħmlu PCR test mal-wasla tagħhom. Dan fost direttivi biex kull persuna suspettata b’kuntatt ma’ xi ħadd infettat bl-Omicron tmur bilfors f’iżolament għal minimu ta’ għaxart ijiem u meta mbagħad iridu jsirulha t-testijiet dovuti.
Sadanittant, l-awtoritajiet tas-saħħa fir-Renju Unit, fl-aħħar sigħat, ikkonfermaw li hemm ‘il fuq minn 340 każ tal-Omicron fl-artijiet tagħhom.
Min-naħa tagħhom, ix-xjentisti qed jghidu li l-Omicron għandu potenzjal li jgħaddi lid-Delta bħala l-varjant numru wieħed tal-Covid fil-pajjiżi tal-Ewropa. Madankollu, jeħtieġu jgħaddu l-ġimgħat biex l-esperti jikkalkulaw bl-eżatt kemm il-vaċċini huma effettivi fil-konfront tal-varjant Afrikan.
Fi żviluppi oħra, l-awtoritajiet fi Franza ħarġu direttivi biex in-nightclubs fil-pajjiż jagħlqu għal erba’ ġimgħat bħala miżura ta’ sigurtà – meta dan il-pajjiż hu fost l-aktar stati Ewropej li rappurtaw żieda sinifikanti fil-każi tal-Omicron.
Il-Ministru tas-Saħħa Franċiż, Olivier Veran, ħabbar li l-inċidenza ta’ 400 infezzjoni għal kull 100,000 ċittadin tfisser li r-rati huma diġà ogħla mill-eqqel tat-tielet mewġa tal-coronavirus fil-pajjiż.
Dan meta l-Prim Ministru ta’ Franza, Jean Castex, sostna li pajjiżu jinsab diġà fi ġlieda qalila kontra l-ħames mewġa tal-Covid-19.
Fil-Ġermanja, intant, komplew is-sejħiet biex iċ-ċittadini jitlaqqmu kontra l-Covid, meta l-mexxejja federali u tal-Istati Ġermaniżi qablu dwar sensiela ta’ miżuri ġodda intiżi biex jikkontrollaw il-firxa konsistenti ta’ infezzjonijiet madwar il-pajjiż.
//= $special ?>