Il-kmandant militari ewlieni tal-Indja tilef ħajtu fit-tiġrif ta’ ħelikoper, li seħħ fl-Istat ta’ Tamil Nadu, lejn in-naħa t’isfel tal-pajjiż.
Minbarra Bipin Rawat, il-Kap tad-Difiża Indjana, mietu wkoll fit-tiġrif martu flimkien ma’ ħdax-il persuna oħra. Intant, it-tiġrif tal-ħelikopter, tat-tip Mi-17V5, seħħ qalb l-għoljiet viċin il-belt ta’ Coonoor – fost rapporti li salvat persuna waħda biss li qed tkun trattata l-isptar għall-ġrieħi.
Il-Ġeneral Rawat kien inħatar bħala l-ewwel Kap Ewlieni tad-Difiża tal-Indja f’Jannar tal-2019 – u meta taħt il-kontroll tiegħu kien hemm l-Armata, flimkien mal-qawwiet tal-ajru u tal-baħar. Sadanittant, l-ogħla tmexxija tal-qawwiet tal-ajru Indjani qed jinvestigaw il-kawża tal-inċident fatali.
