In-Nazzjonijiet Uniti qed issegwi s-sitwazzjoni inkwetanti fil-Filippini fejn l-awtoritajiet qed jistennew aktar ġranet ta’ maltemp qalil – u wara li l-maltemp straordinarju minn ‘super-tifun’ kien qed jistraxxna l-inħawi lejn in-nofsinar tal-pajjiż.
Il-mejtin b’kaġun tal-maltemp qabżu, almenu, l-għaxra, b’eluf ta’ residenti qed ikollhom ifittxu l-kenn fost it-twissijiet regolari dwar għargħar u qerda ta’ proprjetà.
Il-mewġa tal-maltemp laqtet l-ewwel il-gżira ta’ Siargao, li hi popolari ħafna mat-turisti u meta t-tifun beda jiġġenera rwiefen b’saħħa ta’ 175 kilometru fis-siegħa.
L-aħħar rapporti qalu li s-servizzi ta’ komunikazzjoni ma kenux qed jaħdmu għal Siargao u bnadi oħra tal-Filippini – bil-provvista tal-elettriku tinqata’ għal numru ta’ zoni.
In-Nazzjonijiet Uniti qed tgħid li mat-13-il miljun Filippin kapaċi jispiċċaw affettwati mill-impatt tat-tifun – u meta fl-aħħar jumejn, tħassru numru kbir ta’ titjiriet, bil-portijiet jispiċċaw magħluqin minħbba l-potenzjal ta’ aktar maltemp ‘terribbli’.
Is-super-tifun – imlaqqam Rai – hu fost l-aktar tifuni b’saħħithom li laqtu lill-Filippini din is-sena. Il-komunitajiet li mistennija jirrappurtaw l-agħar straġi jinsabu qrib il-kosta, fejn is-servizzi tal-Federazzjoni tas-Salib l-Aħmar qabblu l-avvanz tat-tifun ‘mal-avvanz ta’ ferrovija’.
Il-Filippini, kull sena, tgħaddi minn perjodu ta’ maltempati fenomenali li jinkludu ċ-ċikluni u tifuni qattiela.
