Raġel li l-identita’ tiegħu għadha mhux magħrufa, jinsab fil-periklu li jitlef ħajtu wara li waqa’ madwar sular u nofs waqt li kien qed jagħmel xi xogħol ġewwa fabbrika.
L-inċident seħħ għall-ħabta ta’ nofsinhar fil-Qasam Industrijali tal-Marsa.
Hu ngħata l-assistenza minn tim mediku, ittieħed l-Isptar Mater Dei b’ambulanza u ġie ċċertifikat li sofra ġrieħi serji.
Bil-każ ġie nfurmat il-Maġistrat tal-Għassa Leonard Caruana waqt li l-investigazzjonijiet tal-Pulizija għadhom għaddejjin.
