Wara l-istqarrija iebsa tal-Union tal-Infermiera u l-Qwiebel, issa anke l-Assoċjazzjoni tat-Tobba fis-Saħħa Pubblika l-MAPHM ħarġet tappella għal aktar responsabbiltà u miżuri aktar stretti.
L-MAPHM spjegat li s-servizzi tas-saħħa qed jiffaċċjaw pressjoni enormi bir-rata dejjem togħla ta’ infezzjonijiet u ta’ pazjenti fl-isptarijiet.
Huma qalu li s-servizzi kollha marbuta mas-saħħa inkluż il-helpline tal-Covid il-111, ukoll iċ-ċentri tat-testijiet, id-dipartiment tal-contact tracing, iċ-ċentri tas-Saħħa Primarja u dipartimenti oħra jinsabu taħt pressjoni kbira.
Filwaqt li rringrazzjat lill-ħaddiema kollha f’dawn id-dipartimenti, l-MAPHM wissiet li s-sitwazzjoni mistennija tiggrava qabel ma taqleb għall-aħjar, u li jekk jiġri dan, l-isptar mhux se jkun jista’ jlaħħaq.
Bħall-MUMN, l-MAPHM appellat għal aktar miżuri u għaż-żamma tagħhom filwaqt li sejħet għal aktar responsabbiltà mill-pubbliku sabiex tkun salvagwardjata s-saħħa ta’ kulħadd u sabiex l-edukazzjoni tkun tista’ tkompli fil-klassijiet fil-ġimgħat li ġejjin.
L-Assoċjazzjoni elenkat numru ta’ affarijiet li wieħed għandu jagħmel biex jitnaqqas kemm jista’ jkun ir-riskju tal-mard:
- Ħu l-vaċċin tal-Covid u tal-influenza, inkluż il-boosters u laqqam lit-tfal
- Ilbes maskra dejjem u kif suppost (għatti ħalqek u mnieħrek sew)
- Aħsel idejk regolarment bis-sapun jew uża s-sanitizer
- Tmissx wiċċek u ħalqek għalxejn
- Jekk tħossok ma tiflaħx jew tissuspetta li kellek kuntatt ma’ persuna pożiittiva għall-Covid, oqgħod id-dar u itlob swab test. Toqgħodx tistenna telefonata biex tagħmel dak li għandek tagħmel biex tissalvagwardja saħtek u dik ta’ ħaddieħor
- Illimita l-kuntatt soċjali tul il-festi tal-Milied – mhux iż-żmien li torganizza attivitajiet
- Meta żżur qrabatek, tgħannaqhomx u jekk tista’ evita laqgħat fil-magħluq
- Qatt titħallat ma aktar minn 3 households oħra
- Agħżel fejn tiekol. Kemm jista’ jkun sajjar int jew ordna delivery, jew jekk se tiekol minn barra għażel post fil-miftuħ
- Għamel ix-xirja online jekk tista’
- Evita l-folol u żomm id-distanzi
- Evita attivitajiet li mhumiex essenzjali bħal ċinema, bars, cafeterias, pixxini u gyms
- Meta tkun fi kju żomm id-distanza u ibqa’ bil-maskra
