Amazon kellhom jaġġornaw is-settings ta’ Alexa, l-assistenta virtwali tal-kumpanija tat-teknoloġija wara li din sfidat lil tifal tmiss munita ma’ plakka tal-elettriku nofsha mdaħħla fis-socket.
Dan wara li t-tifla ta’ 10 snin staqsiet lil Alexa għal sfida li tista’ tagħmel.
Omm iċ-ċkejkna spjegat li ftit qabel kienu qed jagħmlu sfidi ma’ għalliem tal-edukazzjon fiżika minn fuq Youtube u meta lestew, is-sistema teknoloġika ssuġeritilhom sfidi li jistgħu isibu fuq l-internet.
L-isfida li tagħtha Alexa, magħrufa bħala l-‘penny challenge’, bdiet tiċċirkola fuq TikTok madwar sena ilu, u d-Dipartiment tat-Tifi tan-Nar fl-Istati Uniti kien fost l-ewwel li kkundanna din l-isfida.
Intant fl-aħħar inċident, omm it-tifla bdiet tgħajjat “le Alexa le” kif semgħet l-istruzzjonijiet li l-assistant virtwali tat lil bintha. Hija madankollu qalet li t-tifla tagħha kienet intelliġenti biżżejjed biex ma tobdix lil Alexa f’dak li qaltilha tagħmel.
Intant kif saru jafu b’dan l-iżball, Amazon ħadu azzjoni immedjata.
