Raġel bla xogħol minn Santa Venera nżamm arrestat sakemm tingħata s-sentenza, wara li wieġeb ħati li pprova jwettaq serqa minn fuq raġel ieħor meta kien armat b’sikkina fil-Marsa. Dorian Grech ta’ 24 sena tressaq quddiem il-Maġistrat Donatella Frendo Dimech, bl-Ispettur Lydon Zammit jakkużah b’attentat ta’ serq, aggravat mill-vjolenza u l-ħin, li żamm lill-vittma tiegħu kontra r-rieda tiegħu bl-intenzjoni li jġiegħlu jagħtih flus kontra r-rieda tiegħu u li ġarr strument li jaqta’ u bil-ponta fil-pubbliku mingħajr liċenzja.
Huwa wieġeb ħati u l-Qorti qalet lill-akkużat li kienet fid-dmir li tinfurmah li l-piena għal dawn ir-reati kienet “pjuttost oneruża,” u tah żmien biex jerġa’ jikkunsidra t-talba tiegħu u jiddiskuti l-kwistjoni mal-avukat tiegħu. Huwa baqa’ jippersisti bit-tweġiba ta’ ħati.
L-Ispettur Zammit informa lill-Qorti li l-akkużat kellu problema akuta ta’ vizzju tad-droga u kien waqaf xejn inqas minn seba’ programmi volontarji ta’ rijabilitazzjoni mid-droga. Fis-sottomissjonijiet tal-prosekuzzjoni dwar il-piena, il-qorti ntalbet timponi sentenza ta’ kustodja u ordni ta’ trattament biex tiżgura li Grech jirċievi t-trattament meħtieġ biex jegħleb il-vizzju tiegħu, darba għal dejjem.
L-Ispettur Zammit qal li l-akkużat kellu bżonn lil xi ħadd biex “jaqbdu minn widnejh u jġiegħlu jifhem li għandu bżonn l-għajnuna.” “Fejn ma tistax tmur waħdek, itlob għall-għajnuna. Tirċiviha,” qaltlu il-Maġistrat. Il-każ tpoġġa għas-sentenza li se tingħata nhar it-Tnejn. Intant l-akkużat se jinżamm arrestat. L-avukat Ramon Bonnett Sladden assista lill-akkużat bħala avukat tal-għajnuna legali.
