Robert Abela reġa’ għamilha. Għal darb’oħra, minn kemm ilu li ħa post Joseph Muscat, injora totalment il-proċess demokratiku.
Hekk iddikjara l-ġurnal The Malta Independent, fl-Editorjal tiegħu, wara l-mod kif il-Prim Ministru għażel li jkompli jimmanipola l-Grupp Parlamentari tiegħu billi ma jsirx il-proċess demokratiku tal-elezzjoni każwali, iżda qabad u daħħal lil min irid hu.
It-Tnejn li għadda Abela għamel din il-mossa għall-ħames darba minn kemm ilu jmexxi lil-Labour, bl-għażla ta’ Andy Ellul wara r-riżenja ta’ Silvio Grixti. Qablu, Abela diġà daħħal lil Miriam Dalli, Clyde Caruana, Jonathan Attard u Oliver Scicluna … bi tnejn minnhom saħansitra jitfagħhom fil-Kabinett.
Ironikament, minkejja li l-Partit Laburista kien tela’ fil-Gvern bl-għajta li kellu jkun l-aktar Gvern femminista fl-istorja, mill-ħames persuni magħżulin direttament minn Abela fl-aħħar sentejn, kien hemm biss mara waħda…. bl-erbgħa l-oħra jkunu rġiel.
Il-ġurnal jgħid illi jidher ovvju li l-fatt li ħadd mill-Kandidati tat-tielet distrett ma tefa’ ismu għall-elezzjoni każwali seħħ wara manuvri interni li kellhom il-barka ta’ Abela nnifsu. U dan l-istil repetut ma hu xejn ħlief sinjal ta’ awtokrazija – jew fi kliem sempliċi dittatorjat jew tirannija.
Filwaqt li fakkar fil-manuvrar biex dan il-proċess s’issa sar għal ħames darbiet, il-ġurnal ifakkar fl-aktar manuvra klassika – jew kif isejjaħlu farsa – meta ntagħżel Oliver Scicluna.
Dan hekk kif, mar-riżenja ta’ Edward Scicluna biex dan isir Gvernatur tal-Bank Ċentrali, fl-elezzjoni każwali kien elett Gavin Gulia, li mal-ġurnalisti kien iddikjara li kien se jerħi l-kariga fit-tmexxija tal-Awtorità tat-Turiżmu biex iservi fil-Parlament. Madankollu, ftit minuti biss wara li ħa l-ġurament, hu kien informa lill-Ispeaker tal-Kamra li kien qed jirriżenja minn Membru Parlamentari u baqa’ Chairman tal-MTA… b’Oliver Scicluna jkun il-magħżul ta’ Abela biex jispiċċa fil-Parlament.
Il-ġurnal itemm li l-mod kif Abela qed jilgħab bil-proċess elettorali jħalli ħafna mistoqsijiet mhux imwieġba – meta dan suppost hu wieħed mill-pedamenti tad-demokrazija – biex jagħżel biss lin-nies li jogħġbu lilu.
Sadanittant, l-istess tema kienet is-suġġett tal-Editorjal tat-Times of Malta, li qal li l-proċess għandu jkun evitat għax ir-rappreżentanti tal-poplu għandhom ikunu magħżulin direttament mill-poplu.
Iżda jista’ jkun, spjega l-ġurnal, li Abela kellu jirrikorri għal dawn l-għażliet għax ma rnexxielux jeħles qabel minn xi persuni li għad għandu fil-Grupp Parlamentari jew li almenu jieħu azzjoni drastika fil-konfront tagħhom. Għax minkejja li jkunu d-Deputati li għamlu l-ħażin, ir-responsabbiltà xorta tibqa’ ta’ Abela.
