Raġel li kien estradit lejn Malta minn Spanja biex jiffaċċja akkużi li seraq apparat elettroniku u ġojjellerija li tiswa’ eluf kbar ta’ ewro minn appartament ta’ Santa Venera fl-2015 spiċċa il-ħabs wara li wieġeb ħati. George Cristian Mandrescu, li m’għandux indirizz fiss f’Malta, spiċċa fl-iżbarra fil-baċir quddiem il-Maġistrat Ian Farrugia.
Huwa tressaq akkużat mill-Ispettur Christina Delia li fid-19 ta’ Novembru 2015 seraq l-oġġetti. Ma setgħux jintraċċaw lis-suspettat f’Malta u jissuspettaw li kien ħarab mill-gżejjer, il-pulizija kienet ħarġet Mandat ta’ Arrest Ewropew, li wassal biex f’Novembru li għadda ġie arrestat fi Spanja.
Mandrescu, li ġej mir-Rumanija, ġie mixli b’serq aggravat bil-valur, il-post u l-mezzi. Huwa kien akkużat ukoll li kien reċediv. L-imputat, rappreżentat mill-avukat Joe Brincat, ressaq dikjarazzjoni ta’ ħati waqt li tressaq il-Qorti l-Ġimgħa filgħodu.
Fil-Qorti ngħad li huwa kien ammetta wkoll il-ħtija tiegħu waqt l-istqarrija tiegħu lill-pulizija wara li kien interrogat. Wara li semgħet lir-raġel jikkonferma l-ħati tiegħu, il-Qorti kkundannatu 21 xahar ħabs, li minnhom kellu jitnaqqas iż-żmien li kien qatta’ taħt arrest.
