Il-prosekuzzjoni fil-proċeduri kontra żewġ uffiċjali korrettivi li jinsabu akkużati b’responsabbiltà kriminali dwar il-mewt suwiċida ta’ Kim Borg Nicolas Virtu, temmet l-istadju tal-provi tagħha. Din l-informazzjoni ħarġet fil-Qorti meta kompliet il-kumpilazzjoni tal-provi fil-konfront ta’ Annabelle Cauchi ta’ 51 sena minn Ħaż-Żebbuġ u Alison Vassallo ta’ 41 sena mill-Fgura.
Il-każ kontra ż-żewġ nisa beda f’Novembru meta kienu dehru għall-ewwel darba taħt ċitazzjoni, qed iwieġbu mhux ħatja ta’ omiċidju involontarju kif ukoll li allegatament wettqu reat li kienu obbligati li jipprevjenu. L-allegata vittma tagħhom kienet ippruvat tikkommetti suwiċidju fil-Faċilità Korrettiva ta’ Kordin fis-16 ta’ Ġunju u spiċċat mietet ftit jiem wara fl-Isptar Mater Dei.
Inkjesta mmexxija mill-Maġistrat Donatella Frendo Dimech kienet saret biex tiġbor provi dwar iċ-ċirkustanzi tal-mewt tal-priġuniera, biex fl-aħħar mill-aħħar ordnat lill-awtoritajiet tal-pulizija biex jieħdu passi kriminali kontra ż-żewġ warders.
Kopja tal-atti ta’ dik l-inkjesta minn dak iż-żmien ġew ippreżentati fil-proċeduri pendenti quddiem il-Maġistrat Caroline Farrugia Frendo. Fid-dawl tal-fatt li x-xhieda kienu xehdu kollha fil-kors tal-inkjesta maġisterjali, li kienet deskritta bħala “voluminuża”, l-Ispettur tal-prosekuzzjoni Paul Camilleri informa lill-Qorti li l-prosekuzzjoni kienet għalqet il-provi tagħha.
Kopja ta’ dik l-inkjesta kienet diġà saret disponibbli għall-avukati tal-akkużati li jkollhom bżonn jgħarblu d-dokumentazzjoni biex ifasslu d-difiża tagħhom. Il-ballun issa kien f’saqajn id-difiża meta l-każ jerġa’ jibda f’Mejju. L-avukati Mario Mifsud u Herman Mula huma avukati difensuri. L-avukati Rachel Tua u Edmond Cuschieri qed jirrappreżentaw lill-familja tal-vittma.
