Raġel ta’ 53 sena residenti Ħal Għaxaq inżamm taħt arrest preventiv wara li ma saritx talba għall-pleġġ fil-konfront tiegħu fuq akkużi li kkaġuna feriti gravi fuq missieru ta’ 76 sena,feriti ħfief fuq ħuh u li hedded b’mod verbali lil tnejn miz-zijit tiegħu li għandhom aktar minn 60 sena. Huwa ġie mixli wkoll li hedded lit-tifel ta’ ħuh, li għad għandu seba’ snin.
L-akkużat li ismu mhux qed jixxandar biex jiġu protetti l-vittmi wieġeb mhux ħati tal-akkużi miġjubin kontrih. Huwa ġie mixli b’16-il akkuża quddiem il-Maġistrat Rachel Montebello bl-allegati reat jseħħu nhar il-Ħadd li għadda bejn il-11.30am u l-4.00pm.
Ir-raġel li qal li huwa xufier tat-trailers ġie mixli wkoll li wettaq ħsara fil-propjetà ta’ zitu u li bil-mod kif aġixxa ħareġ barra mill-limit tal-provokazzjoni, liema theddid u provokazzjoni allegatament saret ukoll permezz tal-meżżi ta’ kommunikazzjoni, f’dan il-każ bil-mobile.
L-Avukat Mario Mifsud qal li l-klijent tiegħu għaddej bil-kura u jieħu xi mediċina u talab biex l-akkużat jintbagħat fit-Taqsima Forensika tal-isptar Monte Carmeli, liema talba ma kellhiex oġġezzjoni minn naħa tal-Ispettur Audrey Micallef. Il-Qorti qalet li hija ma tistax tordna lid-Direttur tal-Faċilità Korrettiva ta’ Kordin biex jaderixxi ma’ din it-talba imma se tirrakkomandalu biex dan isir u għaldaqtant se ssir talba f’dan is-sens.
//= $special ?>