Il-Partit Nazzjonalista hu l-Gvern Alternattiv li jrid jindirizza t-tħassib u l-uġigħ tan-nies, partikolarment bl-isfidi li qed iġib miegħu l-għoli tal-ħajja.
Hu għalhekk li l-Partit Nazzjonalista qed jipproponi fost l-oħrajn li jagħti lura bħala kumpens il-miljuni li l-Gvern Laburista ilu jisraq minn bwiet il-poplu Malti u Għawdxi mill-kontijiet tad-dawl u l-ilma.
Kliem il-President tal-Kunsill Ġenerali tal-Partit Nazzjonalista u Kandidat għall-elezzjoni ġenerali li ġejja Mark Anthony Sammut matul konferenza tal-aħbarijiet wara li l-Uffiċċju Nazzjonali tal-Istatistika (NSO) kkonferma kif il-pjaga tal-għoli tal-ħajja qed tkompli tgħaddas lill-familji Maltin u Għawdxin.
Fl-aħħar sigħat sar magħruf li eluf ta’ persuni wieġbu għas-sejħa li l-Partit Nazzjonalista għamel f’Mejju li għadda u ppreżentaw il-kontijiet tad-dawl biex ikunu ċċekjati għax insterqu mill-Gvern.
Quddiem dan il-fatt, il-Partit Nazzjonalista qed itenni l-appell lill-Gvern biex jagħti lura l-flejjes li daħħal minn dan is-serq istituzzjonalizzat. U dan għandu jsir mhux biss għax hekk għandu jkun, iżda biex il-familji jkunu mgħejjunin fil-ġlieda kontra l-għoli tal-ħajja.
Mark Anthony Sammut spjega li quddiem din ir-realtà, il-Gvern mhux talli mhu qed jagħmel xejn, talli baqa’ jberbaq il-flus. Bħalma għamel maċ-Chief of Staff ta’ Chris Fearne, Carmen Ciantar, li qed tingħata €13,000 fix-xahar f’kuntratt approvat minn Robert Abela u li, minkejja li ġab il-kundanna tal-Awditur Ġenerali, Fearne qal li xorta jħallih fis-seħħ.
Barra minhekk, u meta nofs il-ħaddiema tal-Air Malta se jitilfu xogħolhom minn mal-linja nazzjonali tal-ajru, il-propagandista ewlieni tal-Labour Karl Stagno Navarra se jibqa’ jieħu l-għexieren tal-eluf.
Il-konferenza tal-aħbarijiet kienet indirizzata wkoll mill-Kelliema dwar il-Politika Soċjali Claudette Buttigieg, li qalet li l-Partit Nazzjonalista qed iressaq il-proposti wara li jisma’ l-karbiet tan-nies.
Min-naħa l-oħra, pajjiżna għandu Gvern Laburista li mehdi jagħti l-eluf lill-Partit Laburista għax, wara li għamel hekk bl-Australia Hall, issa ta madwar €30,000 f’reklamar tal-Gvern Laburista esklussivament għall-gazzetta tal-Partit Laburista.
Żewġt iĦdud ilu, il-gazzetta Laburista kellha suppliment ta’ 32 paġna mimli logos ta’ Ministri jew Ministeri, f’sinjal ċar li l-Gvern għadda flus lill-Partit b’dan il-mod. Skont ir-rata tar-reklamar tal-gazzetta, kull reklam minn dawn jiswa €950.
Claudette Buttigieg fakkret kif dan seħħ minkejja li anke l-Inkjesta Pubblika dwar l-assassinju ta’ Daphne Caruana Galizia saħqet li r-reklamar tal-Gvern għandu jsir b’mod ekwu u mhux diskriminatorju.
Min-naħa tiegħu, il-Kelliem dwar il-Ġlieda kontra l-Faqar Ivan Bartolo qal li filwaqt li il-Partit Laburista mhux jifhem lil dawk il-familji li kkollassaw quddiem l-għoli tal-ħajja, il-Partit Nazzjonalista qed ikompli jpoġġi lill-bniedem fiċ-ċentru tal-ħidma tiegħu.
Hu qal li minkejja li l-pjaga tal-għoli tal-ħajja reġgħet kienet ikkonfermata mill-NSO, hu ċar li l-Gvern ta’ Robert Abela m’għandux ħeġġa jindirizzaha. Minflok, il-Gvern Laburista hu mehdi f’inkwiet intern u fit-tberbiq tal-flus.
U għax għal-Labour, il-fqir hu biss numru, qed jieħu mill-bwiet ta’ min qiegħed lura u qed jagħtihom lil min hu ta’ ġewwa, temm jgħid Ivan Bartolo.
