Il-poplu tal-Awstrija qed jesprimi għadab kbir għal liġi ġdida li daħlet fis-seħħ ftit tas-sigħat ilu fil-pajjiż u li tesiġi biex kull ċittadin li għandu ‘il fuq minn 18-il sena jingħata bilfors it-tilqima kontra l-Covid-19.
Filwaqt li numru ta’ pajjiżi introduċew mandati ftit jew wisq simili fir-rigward tal-anzjani u l-ħaddiema mediċi, dawn il-liġijiet qed iħabbtu wiċċhom ma’ reżistenza fost il-protesti li ‘kulħadd għandu d-dritt għall-għażla personali’.
Intant, l-Awstrija hi l-ewwel pajjiż Ewropew li adotta miżuri daqstant riġidi u inflessibbli dwar il-vaċċin u r-reżistenza tan-nies mistennija tikber fil-jiem li ġejjin.
L-aħħar rapporti indikaw li numru sinifikanti ta’ Awstrijaċi ma jaqblux mal-mandat ġdid dwar il-vaċċin li qed jimponi l-Gvern Awstrijak, b’aktar faxxex tas-soċjetà qed itennu li t-tilqima għandha tibbaża fuq l-‘għaża tal-individwu’.
Xi kelliema li xtaqu li jibqgħu anonimi qalu li l-vaċċini, fil-verità, ‘ma waqqfux il-pandemija’ u li l-impożizzjoni tat-tilqim ( kontra l-Covid) ta’ bilfors mhu xejn anqas minn abbuż tad-dritt tal-bniedem li jgħid ‘iva’ jew ‘le’.
Il-Gvern Awstrijak, iżda, wieġeb li t-tilqim hu arma effettiva kontra l-inċidenza ta’ kundizzjonijiet serji relatati mal-infezzjoni bil-Covid. Il-Gvern qal ukoll li l-liġi – minkejja li waħda kontroversjali – hi meħtieġa biex il-pajjiż jevita aktar lockdowns filk-futur.
Karoline Edtstadler , il-Ministru tal-Awstrija għall-Unjoni Ewropea u l-Kostituzzjoni, qalet li l-Gvern tagħha ‘hu konxju li l-impożizzjoni tat-tilqim fuq iċ-ċittadini ta’ 18-il sena ‘il fuq tinvolvi miżura qawwija u diffiċli għal kulħadd.
Edstadler anki ammettiet li l-proċess fejn iċ-ċittadini jridu jingħataw bil-fors it-tilqima jinvolvi ‘indħil fid-drittijiet tal-individwu’ iżda fl-istess ħin sostniet li ‘dan l-indħil jista’ ikun ġustifikat fiċ-ċirkustanzi.’
Il-Ministru spjegat il-ħtieġa li l-Awstrija u l-Ewropa joħorġu mill-pandemija u li ‘il-programmi tat-tilqim kontra l-Covid huma l-uniku mezz li bih il-pajjiżi jistgħu jħarsu ‘il quddiem b’ottimiżmu filwaqt li jirritornaw għall-ħajja normali.
