Il-provvista tad-dawl qed tfalli. Spiċċajna tlifna dishwasher u fridge minħabba n-nuqqasijiet fid-distribuzzjoni.
Dawn huma biss ftit mid-diversi ilmenti li fl-aħħar jiem waslu għand Net News dwar in-nuqqasijiet fid-distribuzzjoni tal-elettriku f’numru ta’ nħawi madwar Malta u Għawdex fosthom il-Belt Valletta, il-Marsa, l-Imqabba, L-Imġarr, il-Għargħur, Għajnsielem, Ta’ Sannat u San Lawrenz; qtugħ ta’ dawl jew provvista baxxa ferm illi qed tħalli effett ħażin fuq l-appliances tad-dar u tkisser ir-rutina ta’ kuljum tal-familji.
Uħud tkellmu anke mat-Times of Malta fejn indikaw dawn il-problemi. Persuni oħra li tkellmu magħna qalulna li minflok il-Gvern tal-Labour għażel li jindirizza din il-problema serja, mar jonfoq il-miljuni fl-Electrogas, biex xorta qed jispiċċaw bla elettriku.
Nies mill-Belt qalulna li fi ġranet partikolari f’ċertu waqtiet l-elettriku telaq sitt darbiet, b’oħrajn qabel joħorġu minn djarhom, jitfu l-appliances biex żgur …jekk jitlaq id-dawl ma ssirx ħsara.
Infatti persuna oħra mill-Imġarr, qal li jipprova jitfi kollox, imma ovvjament il-fridge, trid u ma tridx trid tħalliha għaddejja. Hu spjega li ħallsu prezz għoli għall-appliances, iżda spiċċaw f’sitwazzjoni fejn jew ma jistgħux jużawhom minħabba nuqqasijiet fid-distribuzzjoni, jew inkella dawn spiċċaw bil-ħsara minħabba li jmur id-dawl u jerġa’ jiġi wara ftit.
Oħrajn qalu li meta jċemplu l-Enemalta, il-management ftit li xejn ikollu risposta x’jagħtu…u wara li jibgħatu l-ħaddiema jiċċekjaw, il-problema xorta waħda tibqa’ tippersisti. Residenti li tkellmu magħna qalu li dan kollu jista’ jkun li qed iseħħ minħabba żvilupp enormi li f’waqtiet qed isir bla ħsieb. Oħrajn qalu li mhux ġusta li l-kont tad-dawl sar jiġi kull xahrejn, iżda ilhom ‘il fuq minn xahrejn jistennew tweġiba mill-Enemalta biex ikunu jafu meta din il-problema se tkun solvuta.
